आलेगाव पागात किरकोळ वादातून महिलेसह पतीला मारहाण

शिक्रापूर (शेरखान शेख): आलेगाव पागा (ता. शिरुर) येथे घरासमोर पाणी टाकल्याचा जाब विचारल्याने झालेल्या किरकोळ वादातून एका महिलेसह महिलेच्या पतीला मारहाण करत महिलेच्या मुलीला जीवे मारण्याची धमकी दिल्याने शिरुर पोलीस स्टेशन येथे रुपाली शिंदे, बेबी कुंडलिक शिंदे, मनीषा सुरेश शिंदेव सुरेश शिंदे यांच्या विरुद्ध गुन्हे दाखल करण्यात आले आहे.

आलेगाव पागा (ता. शिरुर) येथील सुनंदा दिवटे या महिलेच्या घरासमोर शेजारील शिंदे कुटुंबातील महिलेने खरकटे पाणी फेकले त्यामुळे सुनंदा यांनी घरासमोर पाणी टाकल्याचा जाब विचारला त्यामुळे चिडून जाऊन रुपाली शिंदे यांसह आदींनी सुनंदा दिवटे यांना शिवीगाळ, दमदाटी करत हाताने व लाथाबुक्य्यांनी मारहाण केली. दरम्यान सुनंदा यांचे पती सुभाष दिवटे हे मध्ये आले असता त्यांना देखील काठीने मारहाण करत जखमी केले. दरम्यान मारहाण करणाऱ्यांनी सुनंदा यांची मुलगी सत्यश्री हिला जीवे मारण्याची धमकी दिली.

याबाबत सुनंदा सुभाष शिंदे (वय ५५) रा. आलेगाव पागा (ता. शिरुर) जि. पुणे यांनी शिरुर पोलीस स्टेशन येथे फिर्याद दिली असल्याने शिरुर पोलिसांनी रुपाली शिंदे, बेबी कुंडलिक शिंदे, मनीषा सुरेश शिंदेव सुरेश शिंदे सर्व रा. आलेगाव पागा (ता. शिरुर) जि. पुणे यांच्या विरुद्ध गुन्हे दाखल केले असून पुढील तपास पोलीस निरीक्षक सुरेशकुमार राऊत यांच्या मार्गदर्शनाखाली सहाय्यक पोलीस उपनिरीक्षक गोपीनाथ चव्हाण हे करत आहे.