सणसवाडीत भरधाव कारच्या धडकेत व्यक्तीचा मृत्यू

शिक्रापूर (शेरखान शेख): सणसवाडी (ता. शिरुर) येथील कृष्णलीला मंगल कार्यालय समोर भरधाव वेगाने आलेल्या अज्ञात कारच्या धडकेत इमाम दस्तगीर शेख या व्यक्तीचा जागीच मृत्यू झाल्याची घटना घडली असल्याने शिक्रापूर पोलीस स्टेशन येथे अज्ञात कार चालकावर गुन्हे दाखल करण्यात आले आहे.

सणसवाडी (ता. शिरुर) येथील कृष्णलीला मंगल कार्यालय शेजारी तात्पुरत्या स्वरूपात रहिवाशी असलेले इमाम शेख हे 8 मे रोजी रात्रीच्या सुमारास रस्त्याचे कडेला पान टपरीवर चाललेले असताना अचानक एक कार भरधाव वेगाने अहमदनगर बाजूने पुणेच्या दिशेने आली.

दरम्यान सदर कारची इमाम शेख यांना जोरदार धडक बसून अपघात झाला. यावेळी अपघातात इमाम शेख हे रक्ताच्या थारोळ्यात पडून त्यांचा जागीच मृत्यू झाला तर अपघातातील सदर कार चालक कार घेऊन पळून गेला. सदर अपघातात इमाम दस्तगीर शेख (वय ४९) सध्या रा. कृष्णलीला मंगल कार्यालय शेजारी सणसवाडी (ता. शिरुर) जि. पुणे मूळ रा. टाकवडे इचलकरंजी ता. शिरोळ जि. कोल्हापूर यांचा जागीच मृत्यू झाला.

याबाबत प्रशांत बाळू पाटील (वय ३९) सध्या रा. कृष्णलीला मंगल कार्यालय शेजारी सणसवाडी (ता. शिरुर) जि. पुणे मूळ रा. टाकवडे इचलकरंजी ता. शिरोळ जि. कोल्हापूर यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात कार चालकावर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस उपनिरीक्षक अमोल खटावकर हे करत आहे.