सणसवाडीत डिकीतील मोबाईल व पाकीटसह दुचाकी चोरी

शिक्रापूर (शेरखान शेख): सणसवाडी (ता. शिरुर) येथील जॉन डियर कंपनीमध्ये कामाला आलेल्या कामगाराने दुचाकीच्या डिकीमध्ये ठेवलेल्या मोबाईल व पाकीटसह दुचाकी चोरीला गेल्याची घटना घडली असल्याने शिक्रापूर पोलीस स्टेशन येथे अज्ञात चोरट्यावर गुन्हे दाखल करण्यात आले आहे.

सणसवाडी (ता. शिरुर) येथील जॉन डियर कंपनीमध्ये शुभम साळुंके हा कामगार कामाला आलेला असताना त्याने कंपनीमध्ये मोबाईल बंदी असल्याने त्याचा मोबाईल त्याच्या ताब्यातील एम एच १२ एम झेड २१७६ या दुचाकीचे डिकीमध्ये ठेवून दुचाकी कंपनीच्या बाहेरील पार्किंगमध्ये लॉक करुन ठेवली होती. रात्री 11 नंतर शुभम कंपनी सुटल्यानंतर बाहेर आला असता पार्किंगमध्ये दुचाकी दिसून आली नाही, त्यामुळे आजूबाजूला पाहणी केली असता दुचाकी चोरीला गेल्याचे निदर्शनास आले.

याबाबत शुभम छन्नू साळुंके (वय २२) रा. औरा सिटी शिक्रापूर (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यावर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस हवालदार कृष्णा व्यवहारे हे करत आहे.