गडचिरोली: फर्निचर देण्याच्या कारणावरून झालेल्या वादाचे पर्यावसान एका तरुणाच्या निर्घृण हत्येत झाल्याची धक्कादायक घटना सोमवारी दुपारी सुमारे ४ वाजण्याच्या सुमारास शहरातील लांझेडा वॉर्डात घडली. या घटनेमुळे गडचिरोली शहरात मोठी खळबळ उडाली आहे.
सचिन रामचंद्र कोलूरवार (वय ३५, रा. विवेकानंद नगर, गडचिरोली) असे मृत तरुणाचे नाव असून महेश महादेव बुरांडे (वय ३४, रा. लांझेडा वॉर्ड, गडचिरोली) असे आरोपीचे नाव आहे.
पोलिसांनी दिलेल्या माहितीनुसार, कोरोना काळात गडचिरोली येथे कार्यरत असलेल्या पुणे येथील एका पोलिस अधिकाऱ्याने सागवानाचे फर्निचर तयार करून देण्यासाठी महेश बुरांडे याला सुमारे दोन लाख रुपये दिले होते. मात्र पाच ते सहा वर्षांचा कालावधी उलटूनही फर्निचर तयार करून देण्यात आले नव्हते. याबाबत वारंवार विचारणा केली जात होती. आठ दिवसांपूर्वी सचिन कोलूरवार आणि त्याचा एक साथीदार त्या पोलिस अधिकाऱ्याच्या वतीने महेशच्या घरी गेले होते व कोणत्याही परिस्थितीत फर्निचर तयार ठेवण्याचा इशारा दिला होता.
तिखटाचा वापर अन् शस्त्राने वार
सोमवारी दुपारी सचिन आणि त्याचा मित्र वाहन घेऊन फर्निचर नेण्यासाठी पुन्हा महेशच्या घरी गेले. मात्र काही फर्निचर अद्याप तयार नसल्याचे पाहून दोघांमध्ये जोरदार बाचाबाची झाली. वाद विकोपाला गेल्यानंतर संतापलेल्या महेशने अचानक सचिनच्या डोळ्यांत मिरचीचे तिखट फेकले. सचिन काही समजण्यापूर्वीच महेशने फर्निचर बनवण्यासाठी वापरल्या जाणाऱ्या धारदार वाकसाने त्याच्या छातीवर सपासप वार केले. या हल्ल्यात सचिन रक्ताच्या थारोळ्यात कोसळला आणि त्याचा जागीच मृत्यू झाला.
घटनास्थळी नागरिकांची गर्दी
भरदिवसा शहरात खुनाची घटना घडल्याने लांझेडा वॉर्ड परिसरात बघ्यांची मोठी गर्दी जमली होती. घटनेची माहिती मिळताच पोलिस निरीक्षक विनोद चव्हाण आपल्या पथकासह घटनास्थळी दाखल झाले. पोलिसांनी पंचनामा करून मृतदेह उत्तरीय तपासणीसाठी जिल्हा रुग्णालयात पाठवला.
आरोपी फरार; पोलिसांचा शोध सुरू
घटनेनंतर आरोपी महेश बुरांडे हा घटनास्थळावरून फरार झाला असून पोलिस त्याचा शोध घेत आहेत. या प्रकरणाचा पुढील तपास पोलिस निरीक्षक विनोद चव्हाण यांच्या मार्गदर्शनाखाली सुरू आहे.
चिमुकली पितृप्रेमाला पारखी
दरम्यान, सचिन कोलूरवार याचा चामोर्शी मार्गावरील संविधान चौकाकडे जाणाऱ्या रस्त्यावर पानठेला होता. सहा वर्षांपूर्वी त्याचा विवाह झाला होता. त्याला साडेतीन वर्षांची एक मुलगी आहे. या घटनेत त्याचा दुर्दैवी मृत्यू झाल्याने चिमुकली पितृप्रेमाला पारखी झाली आहे. मृतदेह जिल्हा रुग्णालयात आणल्यानंतर कुटुंबीयांनी टाहो फोडल्याने परिसरात शोककळा पसरली होती.
मुंबई: महाराष्ट्रात अल्पवयीन मुलींवरील अत्याचाराच्या वाढत्या घटनांमुळे राज्यभर संतापाची लाट उसळली आहे. नुकत्याच समोर आलेल्या…
मुंबई: बारामती विधानसभा पोटनिवडणुकीचा निकाल जाहीर होत असताना मतदारांनी दाखवलेला विश्वास हा “आदरणीय अजितदादांच्या पवित्र…
पालकांची वाढती चिंता, समाजजागृती आणि यंत्रणांच्या जबाबदारीवर पुन्हा प्रश्नचिन्ह मुंबई: महाराष्ट्रात अल्पवयीन मुलींवरील अत्याचारांच्या सलग…
पुणे: पुणे जिल्ह्यातील नसरापूर येथील चिमुकलीवरील अत्याचार व हत्येच्या घटनेने राज्यभर संताप व्यक्त होत असताना,…
जर तुम्ही दररोज सकाळी रिकाम्या पोटी विडयाचे पान खाल्ले तर तुम्हाला त्यातून बरेच फायदे मिळतील.…
बहुतेक लोक विविध पदार्थांमध्ये कढीपत्ता भरपूर वापरतात. कढीपत्ता जेवणाची चव वाढवण्याचे काम करतो. सांबर, डाळ,…