‘टाइमपास’मधील दगडूला खऱ्या आयुष्यात भेटली प्राजू…

मुंबईः ‘टाइमपास’ चित्रपटामधील ‘दगडू’ला अखेर खऱ्या आयुष्यातील प्राजू भेटली आहे. ‘आई बाबा आणि साईबाबाची शपथ, अरे आपण गरीब हुए तो क्या, दिलसे हम अमीर है अमीर’, अशा एकापेक्षा एक डायलॉगच्या माध्यमातून प्रेक्षकांच्या मनावर अधिराज्य गाजवणारा प्रथमेश परब लवकरच लग्नबंधनात अडकणार आहे. सोशल मीडियावर केळवणाचा फोटो शेअर करत त्याने चाहत्यांना सुखद धक्का दिला आहे.

अभिनेता प्रथमेश परब याने होणाऱ्या पत्नीसोबतचा केळवणाचा फोटो शेअर करत खास पोस्ट शेअर केली आहे. त्याने लिहिले की,”#pratija चं ठरलंय हा! बाकी तारीख लवकरच कळवतो. तारीख खूपच स्पेशल आहे. हिंट कॅप्शनमध्येच आहे. नूतन वर्षाच्या हार्दिक शुभेच्छा”. या पोस्टवर यंदा कर्तव्य आहे, केळवण स्टोरीज, लग्न, साखरपुडा, तयारी सुरू असे हॅशटॅगही त्याने दिले आहेत. या पोस्टवर चाहत्यांनी 14 फेब्रुवारी 2024 रोजी प्रथमेश लग्नबंधनात अडकणार असल्याचा अंदाज वर्तवला आहे.

प्रथमेश परब याच्या मैत्रिणीचे नाव क्षितिज घोसाळकर असून, तो म्हणाला, ‘कोटक फाऊंडेशनच्या उन्नती या एनजीओमध्ये क्षितिज काम करते. ती शिक्षिका आहे. क्षितिज आणि माझं लव्हमॅरेज आहे. इंस्टाग्रामवर आम्ही आधी भेटलो. गप्पा मारताना आमची छान मैत्री झाली. ‘टाईमपास 3’च्या शूटिंगदरम्यान आम्ही ठाण्यात पहिल्यांदा भेटलो. पुढे आमच्या मैत्रीचं रुपांतर प्रेमात झालं आणि आता आम्ही संसार थाटण्याचा निर्णय घेतला आहे.’

दरम्यान, प्रथमेश परब याने ‘बालक पालक’, ‘टाइमपास’, ‘टकाटक’ अशा चित्रपटात भूमिका साकारली आहे. सोशल मीडियाच्या माध्यमातून चाहते अभिनेत्यावर शुभेच्छांचा वर्षाव करत आहेत.