जातेगाव बुद्रुकमध्ये कात्रज डेअरीच्या कर्मचाऱ्याची आत्महत्या

शिक्रापुर (शेरखान शेख) जातेगाव बुद्रुक (ता. शिरुर) येथील एका कात्रज डेअरीच्या कर्मचाऱ्याने घरात गळफास घेऊन आत्महत्या केल्याची घटना घडली असुन सदर घटनेत जयदीप सहदेव क्षिरसागर या कामगाराने आत्महत्या केली असल्याने शिक्रापूर पोलीस स्टेशन येथे आकस्मात मृत्यूची नोंद करण्यात आली आहे.

जातेगाव बुद्रुक येथील जयदीप क्षिरसागर हा कात्रज डेअरी पुणे येथे नोकरीला असून सध्या सुट्टी असल्याने तो घरी आलेला होता. दुपारी साडेबारा वाजण्याच्या सुमारास शेजारील काही युवक जयदीपच्या घरी गेले असता त्यांना जयदीप याने घराच्या छताला दोरीच्या सहाय्याने गळफास घेतल्याचे दिसून आले. दरम्यान यावेळी काही नागरिकांनी त्याला खाली घेऊन शिक्रापूर ग्रामीण रुग्णालयात उपचारासाठी आणले असता जयदीप सहदेव क्षिरसागर (वय ३०) रा. जातेगाव बुद्रुक ता. शिरुर जि. पुणे याचा मृत्यू झाल्याचे डॉक्टरांनी घोषित केले.

या घटनेतील आत्महत्येचे कारण समजू शकले नसून याबाबत पोपट बबनराव इंगवले (वय ४५) रा. जातेगाव बुद्रुक ता. शिरुर जि. पुणे यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी अकस्मात मृत्यूची नोंद केली असून पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस उपनिरीक्षक राजेंद्र बनकर हे करत आहे.

कात्रजच्या अध्यक्षांच्याच गावात कर्मचाऱ्याची आत्महत्या…
कात्रज दुध उत्पादक संघाच्या अध्यक्षा केशरताई सदाशिव पवार यांच्याचा गावातील कात्रज डेअरीचा कर्मचारी असेलल्या जयदीप क्षिरसागर याने अध्यक्षांच्याच गावात स्वतःच्या घरात गळफास घेऊन आत्महत्या केल्याने सदर घटना चर्चेचा विषय बनली आहे.