ओव्हरटेकच्या नादात २.५ कोटींच्या SUVची दुचाकीला धडक; एका पार्सलसाठी घराबाहेर पडला अन् परतलाच नाही

मुंबई: वांद्रे-वरळी सी लिंक रेक्लेमेशनजवळ कोस्टल रोडवर शुक्रवारी रात्री भीषण अपघात झाला. ओव्हरटेक करण्याच्या प्रयत्नात सुमारे २.५ कोटी रुपये किमतीच्या लक्झरी SUVने दुचाकीला मागून जोरदार धडक दिल्याची घटना घडली. या अपघातात २० वर्षीय स्विगी डिलिव्हरी बॉयचा उपचारादरम्यान मृत्यू झाला.

शुभम प्रजापती (वय २०) असे मृत तरुणाचे नाव आहे. शुक्रवारी रात्री सुमारे १०.१५ वाजता शुभम दुचाकीवरून पार्सल डिलिव्हरीसाठी जात असताना हा अपघात झाला. SUVची धडक इतकी जोरदार होती की शुभमच्या डोक्याला गंभीर दुखापत झाली आणि तो रस्त्यावर कोसळला.

अपघाताची माहिती मिळताच वांद्रे पोलिसांच्या गस्ती पथकाने घटनास्थळी धाव घेतली. शुभमला तातडीने भाभा रुग्णालयात दाखल करण्यात आले. मात्र, उपचारादरम्यान मध्यरात्री १२.१२ वाजता त्याचा मृत्यू झाला. त्याच्या खिशातील ओळखपत्राच्या आधारे पोलिसांनी त्याची ओळख पटवून कुटुंबीयांना घटनेची माहिती दिली.

राजस्थान पासिंगच्या SUVचा चालक अटकेत

या प्रकरणी वांद्रे पोलिसांनी राजस्थान पासिंग असलेल्या काळ्या रंगाच्या लक्झरी SUVचा चालक **युवराज बाहेती (वय २८)** याला अटक केली आहे. ही कार महालक्ष्मी येथील आयात-निर्यात व्यवसायिकाच्या मुलाची असल्याची माहिती समोर आली आहे.

पोलिसांच्या माहितीनुसार, अपघाताच्या वेळी आरोपी मद्यधुंद अवस्थेत नव्हता. तो खार येथून महालक्ष्मीतील आपल्या घरी जात असताना हा अपघात झाला. अपघातानंतर बाहेती घटनास्थळावरून पळून गेला नाही, तर त्याने पोलिसांना घटनेची माहिती दिली.

पोलिसांनी आरोपीला शनिवारी न्यायालयात हजर केले. त्याला न्यायालयाने जामीन मंजूर केला आहे. निष्काळजीपणे वाहन चालवून मृत्यूला कारणीभूत ठरल्याप्रकरणी BNS आणि मोटार वाहन कायद्यानुसार गुन्हा दाखल करण्यात आला असून, या प्रकरणाचा पुढील तपास वांद्रे पोलीस करत आहेत.दरम्यान, अवघ्या एका पार्सलच्या डिलिव्हरीसाठी घराबाहेर पडलेल्या शुभमच्या मृत्यूमुळे त्याच्या कुटुंबावर दुःखाचा डोंगर कोसळला आहे.