नांदेड परिक्षेत्रात ‘ऑल आऊट ऑपरेशन’चा धडाका; दोन कोटींचा मुद्देमाल जप्त

नांदेड: नांदेड परिक्षेत्राचे पोलीस उपमहानिरीक्षक शहाजी उमाप यांच्या नेतृत्वाखाली अवैध धंद्यांविरोधात पुकारलेल्या ‘ऑल आऊट ऑपरेशन’ अंतर्गत मोठी कारवाई करण्यात आली आहे. अहमदपूर, उमरी, मुदखेड, कळमनुरी, किनगाव आणि गंगाखेड या भागांमध्ये टाकलेल्या धाडीत अवैध वाळू उपसा व जुगार अड्ड्यांवर कारवाई करत सुमारे दोन कोटी रुपयांचा मुद्देमाल जप्त करण्यात आला.

पोलीस उपमहानिरीक्षक कार्यालयाने नागरिकांना पुराव्यानिशी तक्रारी करण्याचे आवाहन केले होते. प्राप्त माहितीनुसार खातरजमा करून विशेष पथकांनी समन्वयाने ही धडाकेबाज कारवाई केली.

वाळू माफियांवर टाच

गेल्या ४८ तासांत लातूर जिल्ह्यातील अहमदपूर पोलीस ठाण्याच्या हद्दीतील रुई शेतशिवारात छापा टाकण्यात आला. येथे अवैधरित्या साठवलेली वाळू, हायवा ट्रक आणि जेसीबी मशीन असा मोठा मुद्देमाल हस्तगत करण्यात आला. तसेच उमरी व मुदखेड परिसरातही अवैध वाळू वाहतुकीवर कारवाई करत संबंधितांविरुद्ध गुन्हे दाखल करण्यात आले आहेत.

जुगार अड्ड्यांवरही कारवाई

जुगारविरोधी मोहिमेत हिंगोली जिल्ह्यातील कळमनुरी येथे तीन आरोपींना अटक करून ४२ हजार १७० रुपयांचा ऐवज जप्त करण्यात आला. लातूरच्या किनगावमध्ये सात आरोपींकडून ४४ हजार ११० रुपये जप्त करण्यात आले, तर परभणी जिल्ह्यातील गंगाखेड येथे १९ आरोपींना अटक करून ६४ हजार ६१० रुपयांची रोकड व साहित्य हस्तगत करण्यात आले.

पोलीस उपनिरीक्षक पंकज इंगळे यांच्या पथकाने ही यशस्वी कारवाई पार पाडली. या मोहिमेमुळे अवैध धंदे करणाऱ्यांमध्ये खळबळ उडाली असून, पुढील काळातही अशाच कारवाया सुरू राहणार असल्याचा इशारा पोलिसांनी दिला आहे.