मोठी बातमी! विजय घाडगे यांना छातीत कळा, प्रकृती खालावली

लातूर: लातूरमध्ये काल राष्ट्रवादी काँग्रेसचे प्रदेशाध्यक्ष सुनील तटकरे यांच्यासमोर पत्ते फेकल्याच्या आरोपावरून छावा संघटनेचे प्रदेशाध्यक्ष विजयकुमार घाडगे यांना मारहाण करण्यात आली. या मारहाणीत विजयकुमार घाडगे गंभीर जखमी झाले असून सध्या त्यांची प्रकृती खालावली आहे. त्यांना आयसीयूमध्ये हलवण्यात आलं आहे.

कृषिमंत्री माणिकराव कोकाटे यांचा विधिंमडळात रमी खेळताना व्हिडीओ व्हायरल झाला. या व्हिडिओच्या निषेधार्थ छावा संघटनेच्या कार्यकर्त्यांनी राष्ट्रवादी काँग्रेसचे प्रदेशाध्यक्ष सुनील तटकरे हे लातूर दौऱ्यावर असताना त्यांच्यासमोर पत्ते भिरकावले.

त्यानंतर छावा संघटनेच्या कार्यकर्त्यांनी सुनील तटकरे यांना “हे घ्या पत्ते आणि मंत्र्यांना तुमच्या घरी पत्ते खेळायला सांगा”, असे म्हणत कोकाटेंचा निषेध केला. याच घटनेनंतर संतप्त झालेल्या राष्ट्रवादीच्या कार्यकर्त्यांनी छावा संघटनेच्या पदाधिकाऱ्यांना मारहाण केली.

या मारहाणीत छावा संघटनेचे प्रदेशाध्यक्ष विजयकुमार घाडगे गंभीर जखमी झाले. त्यांना लातूरच्या अपोलो रुग्णालयात दाखल केले आहे. मात्र त्यांच्या अचानक छातीत दुखायला लागल्याने त्यांना आयसीयूमध्ये हलवण्यात आले आहे. या मारहाणी प्रकरणी छावा संघटनेच्या कार्यकर्त्यांनी महाराष्ट्रभर निदर्शने केली.

तसेच छावा संघटनेच्या कार्यकर्त्यांनी सुरज चव्हाण यांची पक्षातून हकालपट्टी करून विजयकुमार घाडगे यांची माफी मागावी अशी मागणी केली. घडलेल्या घटनेनंतर उपमुख्यमंत्री अजित पवार यांनी नाराजी व्यक्त करत राष्ट्रवादी युवक काँग्रेसचे प्रदेशाध्यक्ष सूरज चव्हाण यांना राजीनामा देण्यास सांगितले आहे.