शिरूर पोलीस स्टेशनच्या वतीने ‘एक पाऊल पुढे’ अभियानांतर्गत वृक्षारोपण

हरित महाराष्ट्रासाठी ७० झाडांचे दत्तक रोपण

शिरूर (अरुणकुमार मोटे): शिरूर पोलीस स्टेशन पुणे (ग्रामीण) यांच्या वतीने “हरित महाराष्ट्र” संकल्पनेला चालना देण्यासाठी ‘एक पाऊल पुढे’ या विशेष मोहिमेअंतर्गत आज शिरूर बसस्थानकजवळील नवीन पोलीस स्टेशनच्या आवारात भव्य वृक्षारोपण कार्यक्रम आयोजित करण्यात आला.

सदर उपक्रमासाठी ‘श्रीविश्वक फाउंडेशन’ यांच्यातर्फे एकूण ७० झाडे उपलब्ध करून देण्यात आली. या कार्यक्रमाचे उद्घाटन शिरूर शहरातील प्रसिद्ध नेत्रतज्ज्ञ डॉ. स्वप्निल भालेकर यांच्या शुभहस्ते संपन्न झाले. कार्यक्रमास शिरूर शहर व परिसरातील राजकीय पक्षांचे पदाधिकारी, नगरसेवक, लोकप्रतिनिधी, सामाजिक कार्यकर्ते, पत्रकार, प्रतिष्ठित नागरिक तसेच महिला कार्यकर्त्यांनी मोठ्या संख्येने उपस्थित राहून पर्यावरण संवर्धनाचा संदेश दिला.

या वेळी शिरूर पोलीस स्टेशनमधील सर्व पोलीस अधिकारी व कर्मचारी “माझं झाड, माझं कर्तव्य” या घोषवाक्याखाली सहभागी झाले. प्रत्येकाने एक झाड स्वतःहून लावले आणि झाड दत्तक घेण्याची जबाबदारी अंगीकारली. एकूण ७० झाडे ही पोलीस कर्मचाऱ्यांना दत्तक देण्यात आली असून, त्या झाडांची निगा राखण्याची जबाबदारी संबंधित कर्मचाऱ्यांकडे सोपविण्यात आली आहे. हाउपक्रम केवळ वृक्षारोपणापुरता मर्यादित न ठेवता निसर्ग संरक्षण, पर्यावरण संतुलन आणि हरित शिरूर या दिशेने एक सकारात्मक पाऊल ठरणार आहे.

शिरूर पोलीस स्टेशनने घेतलेली ही पुढाकारशील भूमिका समाजात पर्यावरण संवर्धनाविषयी जागरूकता निर्माण करणारी ठरत असून, इतर संस्थांसाठीही प्रेरणादायी ठरावी, अशी प्रतिक्रिया नागरिकांमधून उमटत आहे.