शिरुर तालुक्यातील त्या कंपनीत आम्हाला माथाडी कामगारांचा ठेका द्या नाहीतर…

सणसवाडीत कंपनीकडून खंडणी घेणारे दोघे जेरबंद 

शिक्रापूर (शेरखान शेख): सणसवाडी (ता. शिरुर) येथील एका कंपनीत व्यवस्थापकाला धमकी देत माथाडी कामगारांचा ठेका मागून ठेका द्या अन्यथा कंपनी बंद पाडू असे म्हणून खंडणी मागणाऱ्या दोघांवर शिक्रापूर पोलिसांनी गुन्हे दाखल करत राजू मनोहर दरेकर व निखील नामदेव खेंगत या 2 खंडणीखोरांना अटक केल्याची माहिती पोलीस निरीक्षक प्रमोद क्षिरसागर यांनी दिली आहे.

सणसवाडी (ता. शिरुर) येथील एसबीएस इलेक्ट्रोप्लेटर्स आणि वरनादा इंडस्ट्रीज प्रायवेट लिमिटेड यांना कंपनीमध्ये राजू दरेकर व निखील खेंगट या दोघांनी नोव्हेंबर २०२२ मध्ये कंपनी मध्ये वारंवार जाऊन कंपनीचे व्यवस्थापक दयानंद तिवारी यांना भेटून आम्हाला कंपनीमध्ये माथाडी कामगारांचा ठेका द्या, नाहीतर महिन्याला 33 हजार रुपये द्या, असे म्हणत शिवीगाळ, दमदाटी करत जीवे मारुन कंपनी बंद पाडण्याची धमकी दिली. त्यानंतर वारंवार दोघेजण कंपनीमध्ये येऊन धमकी देत असल्याने तिवारी घे घाबरून गेल्याने त्यांनी 2 महिन्याचे 66 हजार रुपये निखील खेंगट याच्या खात्यावर पाठवले. त्यानंतर पुन्हा दोघे त्रास देत असल्याने तिवारी यांची कंपनीचे मालक प्रकाश भट्ट यांच्याशी चर्चा केली.

याबाबत कंपनीचे व्यवस्थापक दयानंद रामसकल तिवारी (वय ५९) रा. सणसवाडी ता. शिरुर जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी राजू मनोहर दरेकर (वय २६) रा. सणसवाडी (ता. शिरुर) जि. पुणे व निखील नामदेव खेंगट (वय २८) रा. पारोडी (ता. शिरुर) जि. पुणे या दोघांवर गुन्हे दाखल करत दोघांना देखील अटक केली असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली सहाय्यक पोलीस निरीक्षक नितीन अतकरे हे करत आहे.

औद्योगिक वसाहतीमध्ये कोणत्याही कंपनी अथवा कंत्राटदारांना कोणी त्रास देऊन, धमकावून खंडणी मागत असेल तर त्यांनी शिक्रापूर पोलिसांत तक्रार द्यावी अथवा ९०७७१००१०० या क्रमांकावर संपर्क करावा असे आवाहन पोलीस निरीक्षक प्रमोद क्षिरसागर यांनी केले आहे.