केंदुरमध्ये विद्युत पंप चोरट्यांच्या हैदासाने शेतकरी हैराण…

शिक्रापूर (शेरखान शेख): केंदुर (ता. शिरुर) येथील शेतकऱ्यांच्या शेतातील विद्युत पंप चोरुन नेण्याच्या अनेक घटना घडत असल्याने चोरट्यांचा हैदास मजल्याचे दिसत असल्याने शेतकरी हैराण झाले असून शिक्रापूर पोलीस स्टेशन येथे अज्ञात चोरट्यांवर गुन्हे दाखल करण्यात आले आहे.

केंदुर (ता. शिरुर) येथील शेतकऱ्यांनी शेतातील पिकांना पाणी देण्यासाठी विहिरीवर विद्युत पंप बसवलेले आहेत. नेहमीप्रमाणे शेतातील पिकांना पाणी देऊन शेतकरी घरी गेलेले असताना भाऊसाहेब मिडगुले शेतात गेलेले असताना त्यांना शेतातील विद्युत पंप व साठ फूट केबल चोरीला गेल्याची दिसून आली.

तसेच दादाभाऊ साकोरे हे शेतात गेले असता त्यांना शेतातील विद्युत पंप व 45 फूट केबल चोरीला गेल्याची दिसून आली. त्याचप्रमाणे फक्कड थिटे हे देखील शेतात गेले असता त्यांना शेतातील विद्युत पंप चोरीला गेल्याचे दिसून आले. त्यामुळे शेतातील विद्युत पंप अज्ञात चोरट्यानी चोरुन नेल्याचे लक्षात आले.

याबाबत भाऊसाहेब दगडू मिडगुले, दादाभाऊ बाळू साकोरे व फक्कड गणपत थिटे तिघे रा.केंदुर (ता. शिरुर) जि. पुणे यांनी शिक्रापूर पोलीस स्टेशन येथे स्वतंत्र फिर्यादी दिल्या असल्याने शिक्रापूर पोलिसांनी अज्ञात चोरट्यांवर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस उपनिरीक्षक विजय चौधर व पोलीस नाईक गणेश सुतार हे करत आहे.