पिकअप गँगचा धडाकेबाज पर्दाफाश; तिघे जेरबंद, ५ गुन्ह्यांचा भंडाफोड

शिक्रापूर (अक्षय टेमगिरे): शेतवस्तीवरील वयोवृद्धांना लक्ष्य करत दरोडे टाकणाऱ्या आंतरजिल्हा टोळीचा स्थानिक गुन्हे शाखा व शिक्रापूर पोलिसांनी पर्दाफाश करत मोठे यश मिळवले आहे. या कारवाईत तीन आरोपींना अटक करण्यात आली असून दोन दरोडे आणि तीन जबरी चोरीचे गुन्हे उघडकीस आले आहेत.

पोलीसांकडून मिळालेल्या माहितीनुसार, ८ फेब्रुवारी २०२६ रोजी मध्यरात्री खैरेनगर (ता. शिरूर) येथे चार अज्ञात आरोपींनी तोंडाला रुमाल बांधून बाळू धोंडींबा खैरे (वय ६९) यांच्या घरावर दरोडा टाकला. दरवाजा दगडाने फोडून घरात घुसलेल्या आरोपींनी खैरे यांना मारहाण केली आणि त्यांच्या पत्नीचे दागिने लुटले. त्यानंतर शेजारील सुनील खैरे यांच्या घरात कोयत्याचा धाक दाखवत दरोडा टाकण्यात आला. या दोन्ही घटनांमध्ये सुमारे ४ लाख ४ हजार रुपयांचा मुद्देमाल लुटण्यात आला होता.

या गंभीर घटनेनंतर पोलीस अधीक्षक संदीप सिंह गिल्ल यांच्या मार्गदर्शनाखाली विशेष पथके तयार करण्यात आली. तांत्रिक विश्लेषण आणि सीसीटीव्ही फुटेजच्या आधारे आरोपी पांढऱ्या रंगाच्या पिकअप वाहनाचा वापर करत असल्याचे निष्पन्न झाले.

गोपनीय माहितीच्या आधारे पोलिसांनी जातेगाव येथे सापळा रचून अनिरुद्ध किरण भोसले (रा. आष्टी, जि. बीड) याला ताब्यात घेतले. चौकशीत त्याने गुन्ह्याची कबुली दिल्यानंतर निकेश रोहिदास काळे (रा. जातेगाव, ता. शिरूर) आणि विकी संजय काळे (रा. भोरवाडी, जि. अहमदनगर) यांना अटक करण्यात आली.

चौकशीत वैभव भोसले, तपेश भोसले (रा. बीड) आणि संदेश भोसले (रा. केडगाव, जि. अहमदनगर) यांचा सहभाग समोर आला असून त्यानुसार गुन्ह्यात वाढीव कलमे लागू करण्यात आली आहेत.

या टोळीने शिक्रापूर, आळेफाटा आणि शिरूर परिसरात मिळून दोन दरोडे व तीन जबरी चोरीचे गुन्हे केल्याची कबुली दिली आहे. आरोपींकडून गुन्ह्यात वापरलेली पिकअप गाडी जप्त करण्यात आली आहे. तसेच त्यांच्यावर यापूर्वीही विविध जिल्ह्यांत मालमत्ता चोरीचे गुन्हे दाखल असल्याने ते सराईत गुन्हेगार असल्याचे स्पष्ट झाले आहे.

ही कारवाई पोलीस अधीक्षक संदीप सिंह गिल्ल, अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, पो.नि. दिपरतन गायकवाड व त्यांच्या पथकाने केली असून पुढील तपास पोलीस उपनिरीक्षक सोमनाथ कचरे करत आहेत.