प्रारूप मतदार यादीवर काँग्रेसचा आक्षेप; ‘नोटीस मिळणाऱ्या मतदारांची बूथनिहाय यादी जाहीर करा’

मुंबई: एसआयआर (Special Intensive Revision) मोहिमेंतर्गत महाराष्ट्रातील प्रारूप मतदार यादी प्रसिद्ध करण्यात आली आहे. या यादीत संशयास्पद (Anomalous) आणि ‘Unmapped’ मतदारांची नावे समाविष्ट आहेत. मात्र, या नावांवर कोणत्याही प्रकारची खूण करण्यात आलेली नसल्याने मतदारांमध्ये संभ्रम निर्माण होण्याची शक्यता असल्याचा दावा महाराष्ट्र प्रदेश काँग्रेस कमिटीने केला आहे.

या मतदारांना नोटीस बजावून सुनावणीसाठी बोलावण्यात येणार असल्याचे सांगण्यात येत आहे. त्यामुळे ज्या मतदारांना नोटीस बजावली जाणार आहे, अशा मतदारांची बूथनिहाय यादी तातडीने प्रसिद्ध करून ती सर्व राजकीय पक्षांना उपलब्ध करून द्यावी, अशी मागणी काँग्रेसने केली आहे.

महाराष्ट्रात एसआयआर प्रक्रियेदरम्यान १ कोटी ५२ लाख मतदार सापडले नाहीत किंवा कायमस्वरूपी स्थलांतरित झाल्याचे दाखवण्यात आले, असा दावा काँग्रेसने केला आहे. याच पद्धतीचा वापर बीएलओंकडून केला जाऊन भविष्यात आणखी कोट्यवधी मतदारांची नावे मतदार यादीतून वगळली जाऊ शकतात, अशी भीती काँग्रेसने व्यक्त केली.

दरम्यान, विधानसभा मतदारसंघनिहाय नोटीस बजावणे आणि सुनावणी घेण्याची कार्यपद्धती अद्याप बीएलओंना स्पष्टपणे देण्यात आलेली नसल्याचा आरोपही काँग्रेसने केला आहे. त्यामुळे नोटीस बजावण्यात येणाऱ्या मतदारांची बूथनिहाय यादी तातडीने जाहीर करावी, अशी मागणी महाराष्ट्र प्रदेश काँग्रेस कमिटीचे सरचिटणीस अॅड. संदेश कोंडविलकर यांनी मुख्य निवडणूक अधिकारी, महाराष्ट्र राज्य यांच्याकडे केली आहे.