दादांनी ज्या कार्यालयात पक्षाचे संघटन उभे केले तिथे नतमस्तक व्हावे या भावनेतून आज पक्ष कार्यालयात आलो

डबडबलेल्या डोळ्यांनी सुनील तटकरे यांनी दादांच्या केबिनमध्ये जाऊन अभिवादन केले

मुंबई: दादांनी ज्या कार्यालयात पक्षाचे संघटन उभे केले तिथे नतमस्तक व्हावे या भावनेतून आज पक्ष कार्यालयात आल्याची माहिती राष्ट्रवादी काँग्रेसचे प्रदेशाध्यक्ष खासदार सुनील तटकरे यांनी माध्यमांनी विचारलेल्या प्रश्नावर उत्तर देताना दिली.

आज कोणतीही पत्रकार परिषद आयोजित केलेली नाही याचा खुलासा पहिल्यांदा सुनील तटकरे यांनी केला. दादांचा अकाली जाण्याचा धक्का आम्हाला बसला असून या धक्क्यातून आम्ही कुणीही सावरलेलो नाही. अजुनही दादा आमच्यात आहेत ही भावना आमच्या मनात आहे. आज कार्यालयात आलो हे माझ्यासाठी क्लेशकारक आहे. याव्यतिरिक्त मला काही बोलायचे नाही असेही सुनील तटकरे यांनी गहिवरलेल्या स्वरात माध्यमांना सांगितले.

आज मुख्यमंत्री देवेंद्र फडणवीस यांची भेट घेतली कारण जनतेच्या मनातील आणि आमच्या मनातील भावना व्यक्त केल्या. दादांनी ज्या पद्धतीने महाराष्ट्र घडवला आज त्यांच्या निधनाने राज्य शोकसागरात आहे. दोन दिवस सर्व मिडियामध्ये दादांचे वेगवेगळे पैलू मांडले आहेत. त्याच शोकाकुल वातावरणात आम्ही आहोत. इतर कुठल्याही विषयावर चर्चा झालेली नाही असेही सुनील तटकरे म्हणाले.

आज पक्ष कार्यालयात आल्यावर खासदार सुनील तटकरे यांनी दादांच्या प्रतिमेला पुष्प अर्पण करून अभिवादन केले. त्यानंतर दादा पक्ष कार्यालयात ज्या केबिनमध्ये बसून कारभार करत होते तिथे जाऊन डबडबलेल्या डोळ्यांनी अभिवादन केले.