मुंबई: महाराष्ट्राचे लाडके नेते, आदरणीय अजितदादा पवार यांच्या निधनाने संपूर्ण राज्यावर शोककळा पसरली आहे. दादांच्या जाण्याचा धक्का आजही स्वीकारणं कठीण असल्याचं सांगत माजी महापौर प्रशांत जगताप यांनी ज्या ठिकाणी अजितदादांना मुखाग्नी देण्यात आला, त्या ठिकाणी जाऊन नतमस्तक होत श्रद्धांजली अर्पण केली.
यावेळी दादांसोबतच्या २४ वर्षांच्या सहवासातील असंख्य आठवणी मनात दाटून आल्याने प्रशांत जगताप भावुक झाले. यानंतर त्यांनी सोशल मीडियावर एक सविस्तर भावनिक पोस्ट शेअर करत अजितदादांशी असलेलं आपुलकीचं, जिव्हाळ्याचं नातं उलगडून दाखवलं आहे.
२४ वर्षांचं नातं, अखेरपर्यंत जपलेली आपुलकी
१० जून १९९९ ते १ जुलै २०२३ या कालावधीत तब्बल २४ वर्षे अजितदादा पवार यांच्या नेतृत्वाखाली राजकीय व सामाजिक कार्य केल्याचं जगताप यांनी नमूद केलं आहे. दादांनी दिलेलं मार्गदर्शन, विश्वास आणि पाठबळ यामुळेच पक्ष संघटना, महापालिका अशा विविध जबाबदाऱ्या निभावण्याची संधी मिळाल्याचं त्यांनी सांगितलं.
जुलै २०२३ मध्ये अजितदादांनी वेगळी राजकीय वाट निवडली, तरीही विचारांवर ठाम राहून भाजपसोबत न जाण्याचा निर्णय घेतला. मात्र, या निर्णयानंतरही दादांनी कधीही मनात आकस ठेवला नाही, उलट नेहमीच सन्मानाचीच वागणूक दिली, असंही जगताप यांनी स्पष्ट केलं.
आजारपणात दाखवलेली मायेची बाजू
जून २०२२ मध्ये चेहऱ्याला पॅरालिसिस झाल्यानंतर अजितदादांनी दाखवलेली काळजी आठवताना जगताप भारावून गेले. “प्रशांत… हे तू चुकीचं केलंस” असं म्हणत दादांनी थेट फोन करून उपचारांची जबाबदारी स्वतः घेतल्याची आठवण त्यांनी सांगितली. “प्रशांत माझा घरातला माणूस आहे” असं डॉक्टरांना सांगणारा नेता म्हणजे केवळ राजकारणी नव्हे, तर हळवा माणूस होता, असं जगताप म्हणाले.
रॅलीतील प्रसंगातून दिसलं नेतृत्वाचं मोठेपण
कसबा पोटनिवडणुकीच्या प्रचारादरम्यान अजितदादांनी गर्दीतही आपल्या कार्यकर्त्याची तब्येत जपल्याचा एक प्रसंग जगताप यांनी शेअर केला. औषधोपचार सुरू असतानाही धावपळ करत असल्याचं पाहून दादांनी रॅली थांबवून काळजी व्यक्त केली. “असा नेता विरळाच” असल्याचं जगताप यांनी नमूद केलं.
राजासारखं मन असलेला राजा माणूस
राजकीय मतभेद असूनही दादांनी कधीही वैयक्तिक संबंध तोडले नाहीत. उलट पुणे महानगरपालिकेच्या निवडणुकीत “प्रशांत जगताप आमचा महापौर होता” असं सांगत सार्वजनिक सन्मान दिला. विरोधात उमेदवारही दिला नाही, यावरून त्यांच्या मनाचा मोठेपणा दिसून येतो, असं जगताप म्हणाले.
“राजासारखं मन असलेला राजा माणूस महाराष्ट्राने गमावला आहे. आज पुन्हा एकदा जिथे दादांना अखेरचा निरोप दिला, तिथे येऊन वंदन केलं,” अशा शब्दांत प्रशांत जगताप यांनी आपल्या भावना व्यक्त केल्या.
शिरुर (तेजस फडके) शिरुर तालुक्यात जागेच्या वादातून तसेच शेळ्या-मेंढ्या चारण्याच्या कारणावरुन मारहाणीच्या दोन स्वतंत्र घटना…
शिरुर (तेजस फडके) शिरुर पोलीस स्टेशनच्या हद्दीत वीजमीटरमध्ये छेडछाड करुन वीजचोरी केल्याप्रकरणी दोन स्वतंत्र गुन्हे…
शिरूर (तेजस फडके) : शिरुर तालुक्यात दुष्काळाच्या झळांनी शेतकरी होरपळत असताना घोड धरणातील पाणीसाठा टिकविण्याच्या…
शिरुर (तेजस फडके): शिरुर तालुक्यात एकीकडे दुष्काळात शेतकरी होरपळत असताना दुसरीकडे विजेच्या तारांच्या शॉर्टसर्किट मुळे…
मुख्यमंत्री देवेंद्र फडणवीस यांची ‘इंडिया केम २०२६’मध्ये घोषणा; रासायनिक उद्योगातील गुंतवणूक आणि रोजगार दुप्पट करण्यावर…
हर्षवर्धन सपकाळ यांचा महायुती सरकारवर घणाघात; ५०० कोटींच्या आरोपांची ईडी चौकशी करण्याचीही मागणी मुंबई: राज्यातील वाढती…