चार महिन्यांतच संसाराचा दुर्दैवी अंत; २४ वर्षीय विवाहितेने घेतला टोकाचा निर्णय

चारचाकीसाठी माहेरहून पैसे आणण्याचा तगादा? छळाच्या आरोपावरून सात जणांविरुद्ध गुन्हा

छत्रपती संभाजीनगर : अवघ्या चार महिन्यांपूर्वी विवाह झालेल्या २४ वर्षीय विवाहितेचा राहत्या घरी मृत्यू झाल्याची घटना शनिवारी (५ सप्टेंबर) सकाळी साडेसातच्या सुमारास जाधववाडी परिसरातील सुरेवाडी येथे उघडकीस आली. निकिता ऋषीकेश वाकळे असे मृत विवाहितेचे नाव आहे.

निकिताचा विवाह एप्रिल महिन्यात ऋषीकेश वाकळे याच्यासोबत झाला होता. निकिता बीएस्सीपर्यंत शिक्षण घेतलेली होती, तर तिचा पती बीएस्सी नर्सिंग झालेला असून खासगी रुग्णालयात नोकरी करत असल्याची माहिती आहे.

दरम्यान, निकिताचे वडील गणेश अर्जुन पठारे (वय ४७, रा. देव पिंपळगाव, ता. बदनापूर) यांनी हर्सूल पोलिस ठाण्यात तक्रार दाखल केली. त्यांच्या तक्रारीनुसार, लग्नानंतर सासरच्या मंडळींकडून चारचाकी वाहन घेण्यासाठी माहेरहून पैसे आणण्याचा तगादा निकिताकडे लावला जात होता. पैशांसाठी तिला शिवीगाळ आणि मारहाण केली जात असल्याचा आरोपही तक्रारीत करण्यात आला आहे. या छळाला कंटाळून निकिताने टोकाचे पाऊल उचलल्याचा आरोप तिच्या वडिलांनी केला.

या तक्रारीवरून हर्सूल पोलिसांनी पती ऋषीकेश सोमीनाथ वाकळे (वय २६) याच्यासह रेखा सोमिनाथ वाकळे (वय ३८), सोमिनाथ कचरू वाकळे (वय ५३), दीक्षा तांबे (वय २९), सुमीत सोमिनाथ वाकळे (वय २०), अनिता दामोधर पवार (वय ३५) आणि मंदा हरिदास दारकुंडे (वय ३३, सर्व रा. सुरेवाडी, जाधववाडी) अशा सात जणांविरुद्ध छळ आणि आत्महत्येस प्रवृत्त केल्याप्रकरणी गुन्हा दाखल केला आहे.

घाटी रुग्णालयात नातेवाइकांचा आक्रोश

घटनेची माहिती मिळताच निकिताच्या माहेरच्या सुमारे २०० नातेवाइकांनी घाटी रुग्णालयात गर्दी केली. सासरच्या मंडळींविरुद्ध गुन्हा दाखल होईपर्यंत मृतदेहाचे शवविच्छेदन करू देणार नसल्याची भूमिका नातेवाइकांनी घेतली. याचवेळी काही नातेवाइकांनी हर्सूल पोलिस ठाण्यात ठिय्या मांडला.घटनेमुळे परिसरात तणावाचे वातावरण निर्माण झाले असून, पोलिसांकडून पुढील तपास सुरू आहे.