राष्ट्रवादीत नवं राजकीय द्वंद्व! रोहित पवारांचे आरोप आणि सुनेत्रा पवार–नरेश अरोरा यांच्या भेटीने खळबळ

मुंबई: राष्ट्रवादी काँग्रेसमध्ये अंतर्गत राजकारण पुन्हा एकदा ऐरणीवर आले आहे. ज्यांच्यावर रोहित पवार यांनी गंभीर आक्षेप घेतले होते, त्याच नरेश अरोरा यांच्या टीमसोबत सुनेत्रा पवार, पार्थ पवार आणि जय पवार यांनी पुण्यातील सर्किट हाऊसमध्ये चर्चा केल्याने पक्षात नव्या चर्चांना उधाण आले आहे.

रोहित पवारांचे आक्षेप आणि दावे

अजित पवार यांच्या अकाली एक्झिटनंतर तब्बल तेरा दिवसांनी रोहित पवारांनी पत्रकार परिषदांची मालिका घेतली होती. या परिषदांमध्ये त्यांनी अजित पवार गटातील काही प्रमुख नेत्यांवर थेट निशाणा साधला. त्यात प्रफुल्ल पटेल, सुनील तटकरे, छगन भुजबळ आणि धनंजय मुंडे यांचा समावेश होता.

पण त्यापुढे जात रोहित पवारांनी डिझाईन बॉक्स कंपनीचे प्रमुख आणि अजित पवारांचे राजकीय सल्लागार नरेश अरोरा यांच्यावरही तीव्र आरोप केले. अजित पवारांना अरोरा यांना दिलेले कॉन्ट्रॅक्ट रद्द करायचे होते; मात्र पक्षातील काही दुसऱ्या फळीतील नेत्यांनी ते रद्द करू नये, असा दबाव टाकल्याचा दावा त्यांनी केला. “चार-पाच नेत्यांनी अजितदादांना एकटे पाडले होते आणि ते आमच्याशी संवादात होते,” असेही रोहित पवारांनी म्हटले होते.

नरेश अरोरा टीमसोबत सुनेत्रा पवारांची चर्चा

या आरोपांनंतरही सुनेत्रा पवार, पार्थ पवार आणि जय पवार यांनी पुण्यातील सर्किट हाऊसमध्ये नरेश अरोरा यांच्या टीमसोबत बैठक घेतली. या टीममध्ये अरोरा यांच्या बंधूंचाही समावेश होता. बैठकीचे तपशील अधिकृतपणे जाहीर झाले नसले तरी राष्ट्रवादी काँग्रेसच्या राष्ट्रीय अध्यक्षपदाबाबत पुढील पंधरा दिवसांत निर्णय होणार असल्याच्या चर्चा त्याच वेळी रंगल्या.सुनेत्रा पवार किंवा पार्थ पवार यांच्या नावावर शिक्कामोर्तब होण्याची शक्यता वर्तवली जात आहे.

प्रफुल्ल पटेल कार्याध्यक्षच?

दरम्यान, कोल्हापूरमध्ये हसन मुश्रीफ यांनी सुनेत्रा पवार लवकरच राष्ट्रवादी काँग्रेसच्या राष्ट्रीय अध्यक्षा होतील, असे वक्तव्य केले. मात्र त्याचवेळी प्रफुल्ल पटेल राष्ट्रीय कार्याध्यक्ष पदावर कायम राहतील, असे सांगत त्यांनी राजकीय चर्चांना अधिकच उधाण आणले.या सर्व घडामोडींमुळे शरद पवार कुटुंब आणि अजित पवार कुटुंब यांच्यातील राजकीय अंतर अधिक स्पष्ट झाल्याचे बोलले जात आहे. शरद पवार कुटुंबाच्या वतीने भूमिका मांडणाऱ्या रोहित पवारांनी नरेश अरोरांवर आक्षेप घेतल्यानंतरही सुनेत्रा पवार आणि त्यांच्या मुलांनी अरोरा टीमशी चर्चा केल्याने रोहित पवारांच्या कथनावर प्रश्नचिन्ह उपस्थित झाले आहे.

राष्ट्रवादीतील ही अंतर्गत सत्तासंघर्षाची लढाई आगामी राष्ट्रीय अध्यक्ष निवडीच्या पार्श्वभूमीवर आणखी तीव्र होण्याची चिन्हे आहेत.