सरकार कुणाचेही असो, रामदास आठवले यांचे मंत्रीपद निश्चित? फडणवीसांनी आठवलेंच्या शैलीत सादर केली कविता

मुंबई : महाराष्ट्राच्या राजकारणात सध्या पक्षफुटी, पक्षांतर आणि सत्तेच्या समीकरणांची जोरदार चर्चा सुरू आहे. निवडणुकीचे तिकीट किंवा मंत्रिपद मिळवण्यासाठी अनेक नेते पक्ष बदलताना दिसतात. मात्र, या सगळ्याला अपवाद ठरलेले एक नाव म्हणजे केंद्रीय राज्यमंत्री डॉ. रामदास आठवले. त्यांच्या पक्षाचा सध्या लोकसभेत एकही खासदार किंवा महाराष्ट्र विधानसभेत एकही आमदार नसतानाही आठवले गेल्या दहा वर्षांपासून केंद्रात मंत्री आहेत.

केंद्रीय राज्यमंत्री रामदास आठवले यांच्या मंत्रिपदाला दहा वर्षे पूर्ण झाल्याच्या निमित्ताने मुंबईत भव्य सत्कार सोहळ्याचे आयोजन करण्यात आले. मुख्यमंत्री देवेंद्र फडणवीस यांच्या प्रमुख उपस्थितीत हा कार्यक्रम पार पडला. यावेळी फडणवीस यांचा अनोखा अंदाज पाहायला मिळाला. त्यांनी रामदास आठवले यांच्या शैलीत चक्क कविता सादर करत त्यांचा गौरव केला.

सरकार कोणाचेही असो, आठवले सत्तेत

रामदास आठवले यांना राजकारणातील चाणक्य म्हटले जात नसले, तरी राजकीय परिस्थितीचा अंदाज घेत त्यानुसार भूमिका ठरवण्यात ते माहीर मानले जातात. सर्वच राजकीय पक्षांशी जुळवून घेण्याची त्यांची शैली आणि आंबेडकरी चळवळीतील प्रभाव यामुळे त्यांनी महाराष्ट्राच्या राजकारणात स्वतंत्र स्थान निर्माण केले आहे.

यामुळेच केंद्रात सरकार कोणत्याही आघाडीचे असो, रामदास आठवले यांना मंत्रिपद मिळण्याची शक्यता कायम चर्चेत असते. काँग्रेससोबत राजकीय वाटचाल केल्यानंतर त्यांनी पुढे भाजपसोबतची आघाडी स्वीकारली आणि मोदी सरकारमध्ये सलग मंत्री म्हणून काम केले.

हुकमी मतदारसंघ नाही, पण गावागावात आठवले गट

रामदास आठवले हे आंबेडकरी चळवळीतील महत्त्वाचे नेते म्हणून ओळखले जातात. त्यांचा स्वतःचा असा हुकमी लोकसभा किंवा विधानसभा मतदारसंघ नाही. मात्र, त्यांच्या रिपब्लिकन पार्टी ऑफ इंडिया (आठवले) गटाची संघटनात्मक उपस्थिती राज्यातील अनेक भागांत आहे.

दलित मतदारांमध्ये असलेला प्रभाव आणि विविध राजकीय पक्षांशी असलेले संबंध यामुळे सत्ताधारी पक्षांकडून आठवले यांना सोबत ठेवण्याचे राजकीय प्रयत्न केले जातात, अशी चर्चा राजकीय वर्तुळात असते.

निवडणूक न लढवता केंद्रात राज्यमंत्री

रामदास आठवले हे रिपब्लिकन पार्टी ऑफ इंडिया (A) चे अध्यक्ष आहेत. सध्या त्यांच्या पक्षाचा लोकसभेत एकही खासदार किंवा महाराष्ट्र विधानसभेत एकही आमदार नाही. मात्र, आठवले स्वतः राज्यसभेचे खासदार आहेत.

2014 मध्ये मोदी सरकार सत्तेत आल्यानंतर त्यांना केंद्रात राज्यमंत्रीपद मिळाले. त्यानंतर 2019 मध्ये आणि 2024 मध्येही मोदी सरकारमध्ये त्यांना पुन्हा राज्यमंत्रीपदाची संधी मिळाली. त्यामुळे सलग दहा वर्षे केंद्रात मंत्री म्हणून कार्यरत राहण्याचा विक्रम त्यांच्या नावावर जमा झाला आहे.

राजकीय भूमिका, कविता आणि फॅशन स्टेटमेंटमुळे कायम चर्चेत

रामदास आठवले यांची राजकीय भूमिका जितकी चर्चेत असते, तितकीच त्यांची कविता सादर करण्याची खास शैली आणि त्यांचा हटके पेहरावही चर्चेचा विषय ठरतो. संसदेत आणि सार्वजनिक कार्यक्रमांमध्ये त्यांच्या मिश्कील कविता अनेकदा लक्ष वेधून घेतात.

याच शैलीची झलक त्यांच्या सत्कार सोहळ्यात मुख्यमंत्री देवेंद्र फडणवीस यांनी दाखवली. आठवले यांच्या शैलीत कविता सादर करत फडणवीसांनी त्यांच्या दीर्घ राजकीय कारकिर्दीचा गौरव केला.

राजकीय समीकरणे सतत बदलत असताना, स्वतःच्या पक्षाचा कोणताही आमदार किंवा खासदार नसतानाही केंद्रातील सत्तेत सलग दहा वर्षे मंत्रीपद टिकवून ठेवण्यात रामदास आठवले यशस्वी ठरले आहेत. त्यामुळे महाराष्ट्राच्या राजकारणात त्यांची राजकीय वाटचाल आजही चर्चेचा विषय ठरते.