शिक्रापुरातील कंपनीतून साडेतीन लाखांचा ऐवज चोरी

शिक्रापूर (शेरखान शेख): शिक्रापूर (ता. शिरुर) येथील ॲलीकॉन कास्टलाय लिमिटेड कंपनीतील सुमारे 3 लाख 50 हजार रुपये किमतीचा ऐवज कंपनीच्या व्यक्तीचा विश्वास संपादन करुन चोरुन नेल्याची घटना घडली असल्याने शिक्रापूर पोलीस स्टेशन येथे वसिम तवीर मनेर याचे विरुद्ध गुन्हे दाखल करण्यात आले आहे.

शिक्रापूर (ता. शिरुर( येथील ॲलीकॉन कास्टलाय लिमिटेड कंपनीत वापरले जाणारे बजाज वाहनांचे सिलेंडर हेड ठेवलेले असताना कंपनीचे जावक असोसिएट निलेश सरोदे हे कंपनीतील मालाचे मोजमाप करत असताना बजाज वाहनांचे तब्बल 350 सिलेंडर हेड कमी असल्याचे त्यांच्या निदर्शनास आले. याबाबतची माहिती त्यांनी कंपनी व्यवस्थापकाला दिली असता त्यांनी कंपनीतील CCTV ची तपासणी केली असता कंपनीमध्ये माल वाहतुकीसाठी आलेल्या वसीम मनेर याने ताब्यातील एम एच १२ यु एम ८७३० या पिकअप वाहनातून सदर माल चोरून नेल्याची बाब समोर आली.

याबाबत राजेश अंबादास जैन (वय ५४) रा. सोमनाथ नगर वडगाव शेरी पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी वसिम तवीर मनेर रा. कोल्हापूर याचे विरुद्ध गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली सहाय्यक पोलीस निरीक्षक नितीन अतकरे हे करत आहे.