दहिवडीत ऊसाच्या ट्रॅक्टरला धडकून युवकाचा मृत्यू

शिक्रापूर (शेरखान शेख): दहिवडी (ता. शिरुर) येथील दहिवडी आंबळे रस्त्यालगत चांदणीचा घाट येथे रस्त्याच्या कडेला उभ्या असेलल्या ऊसाच्या ट्रॅक्टरच्या ट्रॉलीला धडकून सलमान सलीम मुलाणी या युवकाचा मृत्यू झाल्याची घटना घडली असल्याने शिक्रापूर पोलीस स्टेशन येथे अपघाताबाबत गुन्हा दाखल करण्यात आल्याची माहिती शिक्रापूर पोलिसांनी दिली आहे.

दहिवडी (ता. शिरुर) येथील दहिवडी आंबळे रस्त्याने सलमान मुलाणी हा युवक त्याच्या ताब्यातील एम एच १२ क्यू एल ८३१३ या दुचाकीहून जात असताना समोर चांदणीचा घाट येथे रस्त्याच्या कडेला ऊसाने भरुन उभ्या असेलल्या ट्रॅक्टरच्या ट्रॉलीला सलमानच्या दुचाकीची धडक बसून सलमान गंभीर जखमी झाला.

यावेळी नागरिकांनी त्याला उपचारासाठी शिक्रापूर येथील खाजगी रुग्णालयात दाखल केले असता डॉक्टरांनी सलमान सलीम मुलाणी (वय ३२) रा. टाकळी भीमा (ता. शिरुर) जि. पुणे याचा मृत्यू झाल्याचे घोषित केले. घडलेल्या घटनेबाबत विशाल बाळासाहेब लवांडे (वय २७) रा. मांजरेवस्ती दहिवडी (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस हवालदार राजेश माने हे करत आहे.