रितेश-जिनिलिया देशमुख साजरा करत आहेत लग्नाचा १४ वा वाढदिवस

मुंबई: मराठी आणि हिंदी चित्रपटसृष्टीतील लोकप्रिय जोडपे रितेश देशमुख आणि जिनिलिया डिसूझा आज (३ फेब्रुवारी) त्यांच्या लग्नाचा १४ वा वाढदिवस साजरा करत आहेत. या खास दिवशी रितेशने सोशल मीडियावर एक मजेशीर व्हिडिओ शेअर करून पत्नीला हटके शुभेच्छा दिल्या आहेत.

रितेश आणि जिनिलिया दोघेही त्यांच्या विनोदी आणि हटके सोशल मीडिया व्हिडिओंसाठी ओळखले जातात. लग्नाच्या या विशेष दिवशी रितेशने एक रील शेअर केली आहे, ज्यात तो “आगे है बरसात पीछे है तूफान” या गाण्यावर डबिंग करताना दिसतो, तर मागे जिनिलिया बसलेली आहे.

व्हिडिओसोबत रितेशने लिहिलंय

“लग्नाला १४ वर्षे झाली आहेत, हा वनवास कधीच संपू नये. वाढदिवसाच्या शुभेच्छा, बायको!”या पोस्टवर चाहत्यांनी भरभरून प्रतिक्रिया दिल्या आहेत. काही कमेंट्समध्ये लिहिलं गेलं “लग्न वाढदिवसाच्या शुभेच्छा भाऊ आणि वहिनी साहेब””तुम्हा दोघांवरही खूप प्रेम… तुम्हा दोघांना लग्नाच्या वाढदिवसाच्या खूप खूप शुभेच्छा”

१४ वर्षांचा सुखी संसार

रितेश आणि जिनिलिया यांनी ३ फेब्रुवारी २०१२ रोजी लग्नगाठ बांधली होती. दोघांनी मराठी आणि ख्रिश्चन दोन्ही पद्धतीने लग्न केले होते. त्यांच्या प्रेमाची सुरुवात ‘तुझे मेरी कसम’ या चित्रपटाच्या सेटवर झाली होती आणि लग्नाआधी जवळपास १० वर्षे डेटिंग केले. या जोडप्याला दोन मुले आहेत – रियान आणि राहिल.