कलाकेंद्रावरील कथित गोळीबार प्रकरण; गोळीबाराच्या घटनेचा राजकीय हेतूने गैरवापर, शिरूरमध्ये राष्ट्रवादीचा निषेध

शिरूर (अरुणकुमार मोटे): आमदार माऊली कटके यांच्यावर समाजमाध्यमांद्वारे करण्यात आलेल्या बदनामी विरोधात शिरूरमध्ये राष्ट्रवादी काँग्रेसच्या स्थानिक पदाधिकाऱ्यांनी निषेध व्यक्त करत कायदेशीर कारवाईची मागणी केली.

या प्रकरणाशी त्यांचा काही संबध नसताना त्यांच्याबद्दल आक्षेपार्ह मजकूर काही ठिकाणांहून व्हायरल करण्यात आला होता. आमदार रोहित पवार यांनीही याबद्दल टीपण्णी केली तर राष्ट्रवादी कॉंग्रेस शरदचंद्र पवार पक्षाचे रविकांत वर्पे यांच्या नावे पोस्ट व्हायरल करून आमदार कटके व त्यांच्या भावाने दहशत निर्माण करण्याचा प्रयत्न केल्याचे या पोस्टमध्ये म्हटले होते.

काही समाज माध्यमांवर ही पोस्ट व्हायरल झाल्यानंतर राष्ट्रवादी च्या स्थानिक पदाधिकाऱ्यांनी थेट शिरूर पोलिस ठाणे गाठून आमदार कटके यांची बदनामी करणारांचा तीव्र शब्दांत निषेध केला. पोलिस निरीक्षक संदेश केंजळे यांना निवेदन देऊन आमदारांची बदनामी करणारांविरोधात गुन्हा दाखल करण्याची व त्यांच्याविरूद्ध कायदेशीर कारवाईची मागणी करण्यात आली. राष्ट्रवादी चे तालुकाध्यक्ष रवीबापू काळे, शहर अध्यक्ष शरद कालेवार, युवकचे शहर अध्यक्ष एजाज बागवान, क्रिडा विभागाचे शहर अध्यक्ष अतुल गव्हाणे, कुंडलिक शितोळे, रंजन झांबरे, सुनिल जाधव, स्वप्नील रेड्डी, रोहित पटवा, प्रवीण जामदार, अतुल जोशी आदी यावेळी उपस्थित होते.

दरम्यान, आमदार कटके यांच्या बदनामीच्या प्रकाराचा श्रीराम सेनेसह तालुक्यातील विविध संस्था, संघटनांनीही निषेध नोंदविला आहे. आमदार कटके हे जीव ओतून तालुक्याच्या विकासासाठी झटत असताना त्यांच्या विकासाच्या वाटेत अडथळे आणण्याचा हा प्रयत्न असल्याचा आरोप श्रीराम सेनेचे संस्थापक सुनील जाधव यांनी केला आहे.