शिरुर न्यायालयाने डॉक्टर आरोपीस ठोठावली दोन वर्षे शिक्षा व ३० हजार रुपये दंड

शिरुर (तेजस फडके): न्हावरे (ता.शिरुर) गावच्या हददीत नाथकृपा हॉस्पिटल मध्ये दिनांक ९ ऑगस्ट २०२० रोजी रात्री १०:०० वाजण्याच्या सुमारास आरोपी डॉ रामहरी भुजंगराव लाड (रा.न्हावरे, ता.शिरुर,जि. पुणे) यांच्या हॉस्पिटलमध्ये एक महिला उपचार घेत असताना आरोपी डॉ. रामहरी भुजंगराव लाड याने फिर्यादी महिलेस हॉस्पिटलच्या ओपीडीमध्ये बोलावुन घेवुन फिर्यादीचे अंगाशी लगड करून मनास लज्जा उत्पन्न होईल असे कृत्य करुन फिर्यादी सोबत अश्लिल बोलुन फिर्यादीस लज्जा वाटेल असे वर्तन केले होते.

या प्रकाराबाबत शिरुर पोलीस स्टेशन येथे गुन्हा दाखल करण्यात आला होता. सदर गुन्हयाचा तपास पोलीस उपनिरीक्षक एस एन मोटे यांनी पुर्ण करुन आरोपीविरुद्ध न्यायालयात दोषारोपपत्र दाखल केले होते.

सदर गुन्हयाचा खटला शिरुर येथील प्रथमवर्ग न्यायदंडाधिकारी जे ए झारी यांच्या न्यायालयात सुरु होता. यात सरकारच्या वतीने सहायक सरकारी अभियोक्ता माया शिवाजी क्षीरसागर (जाधव) यांनी युक्तीवाद केला असुन वरील प्रकरणामध्ये सबळ साक्षी पुराव्याअंती शिरुर प्रथमवर्ग न्यायदंडाधिकारी जे. ए. झारी यांनी आरोपीस दिनांक २१ फेब्रुवारी २०२५ रोजी भारतीय दंड विधान सहिता कलम ३५४ मध्ये दोन वर्ष व भारतीय दंड विधान संहिता कायदा कलम ३५४ (अ) मध्ये दोन वर्ष कारावास दोन्ही शिक्षा एकत्र भोगावयाच्या आहेत. तसेच ३० हजार रुपये दंड अशी शिक्षा सुनावली आहे.

सरकारी पक्षातर्फे सहायक सरकारी अभियोक्ता माया शिवाजी क्षीरसागर (जाधव), पोलीस निरीक्षक संदेश केंजळे यांच्या मार्गदर्शनाखाली कोर्ट पैरवी म्हणुन पोलीस हवालदार तुकाराम गोरे, महीला पोलीस अंमलदार मनिषा फंड, तसेच वॉरंट व समसबाबत पोलीस हवालदार बाळकृष्ण वाडेकर व पोलीस अंमलदार प्रकाश वाघमारे यांनी कामकाज पाहीलेले आहे.