अजितदादांची कार्यकर्त्यांसाठी शिस्त, निकटवर्तीयांसाठी सूट

मुंबई: राज्याच्या राजकारणात एक नवा विनोद चर्चेत आहे. शिस्त फक्त कार्यकर्त्यांसाठी, पण निकटवर्तीयांना मोकळीक!” अजितदादा नेहमीच कार्यकर्त्यांना कडक शिस्त पाळण्याचे धडे देतात, त्यांना वचनबद्ध राहण्याची शिकवण देतात आणि त्यांच्या चुकांसाठी रागावतात. पण हेच दादा त्यांच्या निकटवर्तीयांच्या बाबतीत मात्र चक्क माफी देतात.

असे म्हणतात, “दादांचा आवाज जसा कडक, तसे नियमही कडक – पण फक्त निवडकांसाठीच!” कार्यकर्त्यांनी जर काही चूक केली, तर त्यांच्यावर दंडात्मक कारवाई होते, पण दादांच्या निकटवर्तीयांनी भ्रष्टाचार, सत्ता गैरवापर किंवा कुठलेही चुकीचे कृत्य केले, तरी ते सहन केले जाते. हीच ती दुटप्पी भूमिका, जी सध्या जनतेच्या चर्चेचा विषय झाली आहे.

एकच दादा, दोन न्याय. सामान्य कार्यकर्त्यांना कडवी शिस्त नेत्यांचे लाडके मात्र साखरपुड्यासारखे गोड. मी चुकीचं काही सहन करत नाही” म्हणणारे दादा काही निवडकांसाठी मात्र नेहमी मृदू स्वभाव दाखवतात! असा सवाल राष्ट्रवादी काँग्रेस शरदचंद्र पवार पक्षाचे प्रवक्ते तथा युवकचे मुंबई अध्यक्ष ॲड.अमोल मातेले यांनी म्हटले आहे. हा विरोधाभासच सांगतो की, “नियम सर्वसामान्यांसाठी, अपवाद सत्तेच्या जवळच्या मंडळींसाठी. राजकारणात नवा सुविचार झाला आहे. “सत्ता असेल तर शिस्तही माफ, कार्यकर्ता असेल तर चूकही घातक. हे बघून कार्यकर्त्यांनी एक गोष्ट शिकावी – “दादांच्या जवळ राहा, म्हणजे शिस्तही गोड लागेल.