शाहरुखच्या ‘पठाण’ विरोधात बजरंग दलाचे चित्रपटगृहाबाहेर निदर्शने, पोस्टर फाडले…

औरंगाबाद: मागील काही दिवसांपासून शाहरुखच्या पठाण चित्रपटावरून मोठा वाद सुरूआहे. आधी बेशरम रंग या गाण्यातील भगव्या रंगाची बिकिनी आणि गाण्याचे बोल यावर आक्षेप नोंदवला गेला होता. त्यानंतर सेन्सॉर बोर्डाने काही बदल सुचवले होते. आज हा चित्रपट प्रदर्शित झाला असून प्रेक्षकांचा उत्फूर्त प्रतिसाद मिळत आहे. चित्रपटाने प्रदर्शनपूर्व तिकीट विक्रीचा विक्रम केल्याने विरोध मावळला असल्याचे चित्र दिसत होते. मात्र, अचानक काही ठिकाणी चित्रपटास विरोध सुरु झाला.

औरंगाबाद शहरातल्या सिडको येथील एका मल्टीप्लेक्ससमोर बजरंग दलाच्या कार्यकर्त्यांनी निदर्शने सुरु केली. चित्रपटाचे पोस्टर देखील कार्यकर्त्यांनी फाडले. अभिनेता शाहरुख खान, पठाण चित्रपट हिंदू विरोधी असल्याचा आरोप करत आंदोलकांनी जोरदार घोषणाबाजी केली. दरम्यान, पोलिसांनी लागलीच परिस्थिती आटोक्यात आणली.