दाफाचि मुंबई २१ : ‘चित्रपट अभिनय अभ्यासक्रम’ कार्यशाळा उत्साहात संपन्न

मुंबई: महाराष्ट्र चित्रपट, रंगभूमी आणि सांस्कृतिक विकास महामंडळ आणि एफटीआयआय पुणे यांच्या संयुक्त विद्यमाने आयोजित करण्यात आलेली ‘चित्रपट अभिनय अभ्यासक्रम’ ही दहा दिवसीय कार्यशाळा उत्साहात पार पडली. १० फेब्रुवारी ते १९ फेब्रुवारी दरम्यान झालेल्या या कार्यशाळेत विद्यार्थ्यांना अभिनयाच्या विविध पैलूंवर सखोल मार्गदर्शन करण्यात आले.

या कार्यशाळेत अभिनेते डॉ. मिलिंद शिंदे यांनी विद्यार्थ्यांना ‘अभिनय म्हणजे नेमके काय?’, संहिता लेखन, संवाद कौशल्य, तसेच लघुपट निर्मितीची प्रक्रिया याविषयी मार्गदर्शन केले. नाटक, सिनेमा आणि मालिकेची संहिता हातात आल्यानंतर तिचा अभ्यास कसा करावा, पात्र समजून घेण्याची पद्धत काय असावी, यावर त्यांनी विद्यार्थ्यांशी संवाद साधला.

विद्यार्थ्यांनी गटागटाने संकल्पना मांडत संहिता लेखनाचा प्रत्यक्ष सराव केला. त्यापैकी ‘ती स्टेशनवर का नाचली’ या संहितेवर आधारित अभिनय आणि चित्रीकरणाचा सराव घेण्यात आला. विद्यार्थ्यांच्या सादरीकरणाचे चित्रीकरण करून त्याचा लघुपट तयार करण्यात आला. हा लघुपट पाहिल्यानंतर डॉ. शिंदे यांनी विद्यार्थ्यांसोबत चर्चा करत त्यातील उणिवा, आवश्यक बदल आणि सादरीकरण अधिक प्रभावी करण्याचे मार्गदर्शन केले.

हिंदी व मराठी भाषेतील उतारे विविध भावनांमध्ये कसे सादर करावेत, याचेही प्रात्यक्षिक विद्यार्थ्यांना देण्यात आले. या दहा दिवसांत सैद्धांतिक ज्ञानासोबतच प्रात्यक्षिकांवर भर देत विद्यार्थ्यांचा आत्मविश्वास वाढविण्यात आला.

सह व्यवस्थापकीय संचालक प्रशांत साजणीकर यांच्या हस्ते प्रमाणपत्र वितरण

कार्यशाळेचा समारोप महामंडळाचे सह व्यवस्थापकीय संचालक प्रशांत साजणीकर यांच्या उपस्थितीत झाला. त्यांनी विद्यार्थ्यांशी संवाद साधत त्यांच्या अनुभवांविषयी जाणून घेतले. विद्यार्थी प्रतिनिधी म्हणून संयोगिता चौहान आणि बहार सूर्यवंशी यांनी कार्यशाळेबाबत आपले मनोगत व्यक्त केले.

यावेळी सर्व सहभागी विद्यार्थ्यांना प्रमाणपत्र देऊन सन्मानित करण्यात आले. अभिनयसृष्टीत करिअर घडवू इच्छिणाऱ्या तरुणांसाठी ही कार्यशाळा मार्गदर्शक ठरल्याची भावना उपस्थितांनी व्यक्त केली.