मुंबईत युवक काँग्रेसचा भाजप कार्यालयासमोर निषेध आंदोलन; कार्यकर्ते ताब्यात

मुंबई: वसंत स्मृती येथील भाजप कार्यालयासमोर आज मुंबई युवक काँग्रेसच्या वतीने जोरदार आंदोलन करण्यात आले. अध्यक्षा झीनत शबरीन यांच्या नेतृत्वाखाली कार्यकर्त्यांनी घोषणाबाजी करत भाजपविरोधात निषेध व्यक्त केला.

लोकसभेतील विरोधी पक्षनेते राहुल गांधी यांना गोळ्या घालून जीवे मारण्याची धमकी देण्यात आल्याच्या पार्श्वभूमीवर हे आंदोलन करण्यात आले. आंदोलनादरम्यान युवक काँग्रेस कार्यकर्त्यांनी भाजप कार्यालयासमोर प्रतीकात्मक फुलांचा वर्षाव करून निषेध नोंदवला. “द्वेष आणि हिंसेच्या राजकारणाला महाराष्ट्रात स्थान नाही,” असा संदेश देण्यात आल्याचे शबरीन यांनी सांगितले.

सायंकाळच्या सुमारास आंदोलनाची हाक देण्यात आल्याने परिसरात पोलिसांचा मोठा बंदोबस्त तैनात करण्यात आला होता. पोलिसांची अडवणूक झुगारून कार्यकर्ते कार्यालयासमोर पोहोचले आणि घोषणाबाजी केली. त्यानंतर पोलिसांनी आंदोलनकर्त्यांना ताब्यात घेऊन भोईवाडा पोलीस स्थानक येथे नेले.

यावेळी बोलताना झीनत शबरीन म्हणाल्या की, लोकशाहीत वैचारिक मतभेद असू शकतात; मात्र हिंसेच्या धमक्या देणे हे लोकशाही मूल्यांवर आघात आहे. संबंधितांवर तात्काळ गुन्हे दाखल करून कठोर कारवाई करावी, अशी मागणी त्यांनी केली. युवक काँग्रेस लोकशाही आणि संविधानिक मूल्यांच्या रक्षणासाठी सातत्याने लढा देत राहील, असेही त्यांनी स्पष्ट केले.

तसेच पोलिसांकडून भाजप कार्यकर्त्यांना मोकळीक दिली जाते, मात्र काँग्रेस कार्यकर्त्यांवर दडपशाही केली जाते, असा आरोपही शबरीन यांनी केला. राहुल गांधींना धमक्या देणाऱ्यांवर कठोर कारवाई करण्याची मागणी त्यांनी पुन्हा एकदा केली