भोंदू अशोक खरातचा ‘डबल गेम’ उघड! आर्थिक गैरव्यवहारांसह शेतकरी फसवणुकीचाही संशय

नाशिक: महिलांचे लैंगिक शोषण प्रकरणामुळे आधीच चर्चेत आलेल्या Ashok Kharat या भोंदू बाबाच्या अडचणी आता आणखी वाढताना दिसत आहेत. तपासादरम्यान त्याच्या आर्थिक व्यवहारांमध्येही मोठा गैरप्रकार झाल्याचा संशय समोर येत आहे.

एसआयटीच्या (SIT) प्राथमिक तपासात धक्कादायक बाबी उघड होत आहेत. अनेक नागरिकांच्या आधार कार्ड आणि पॅन कार्डचा गैरवापर करून खरातने विविध पतसंस्थांमध्ये शेकडो बँक खाती उघडल्याची शक्यता व्यक्त केली जात आहे. विशेष म्हणजे, या खात्यांमध्ये स्वतःला ‘नॉमिनी’ म्हणून नोंदवून कोट्यवधी रुपयांचे व्यवहार केल्याचा संशय आहे. या सर्व खात्यांना एकाच मोबाईल नंबरची लिंक असल्याचेही समोर आले असून, तो नंबर स्वतः खरात वापरत असल्याचे संकेत आहेत. त्यामुळे संपूर्ण आर्थिक व्यवहारांवर त्याचेच नियंत्रण असल्याचा संशय अधिक गडद झाला आहे.

राजकीय कनेक्शनचा धागा

या प्रकरणात आता राजकीय संबंधांचाही कोन पुढे येत आहे. Rupali Chakankar यांच्या संपर्कातील एका व्यक्तीच्या नावानेही खाते उघडण्यात आल्याची माहिती समोर आली आहे. त्यामुळे या प्रकरणाला राजकीय रंग चढण्याची शक्यता व्यक्त केली जात आहे.

बनावट कंपन्यांद्वारे शेतकऱ्यांची फसवणूक?

दरम्यान, अशोक खरातच्या गोरखधंद्याचा आणखी एक धक्कादायक प्रकार समोर आला आहे. बनावट ‘फार्मर प्रोड्यूसर कंपन्या’ स्थापन करून शेतकऱ्यांची फसवणूक केल्याचा आरोप करण्यात येत आहे. NAFED च्या खरेदी प्रक्रियेचा गैरफायदा घेत, कांदा आणि मका खरेदीच्या नावाखाली मोठ्या प्रमाणात व्यवहार केल्याचा संशय आहे.‘व्यंकटेश फार्मर प्रोड्यूसर कंपनी’मध्ये खरात आणि त्याची पत्नी संचालक असल्याची माहिती समोर आली आहे. याशिवाय १५ ते १६ कंपन्यांमध्ये त्याची भागीदारी असल्याची शक्यता तपास यंत्रणांनी व्यक्त केली आहे.

तक्रार आणि पुढील कारवाई

या प्रकरणात Nilesh Shedge (स्वतंत्र भारत पक्ष) यांनी पोलिसांकडे तक्रार दाखल केली असून, ईडीमार्फत चौकशी करून कठोर कारवाई करण्याची मागणी केली आहे.एकूणच, आधीच गंभीर असलेल्या अशोक खरात प्रकरणात आता आर्थिक गैरव्यवहार आणि शेतकरी फसवणुकीचा नवा कोन समोर आल्याने तपास अधिकच गडद झाला आहे. येत्या काळात या प्रकरणातून आणखी मोठे खुलासे होण्याची शक्यता नाकारता येत नाही.