हिंदकेसरी महेंद्र गायकवाड यांचा भव्य नागरी सत्कार; जयकुमार गोरे यांची उपस्थिती

मंगळवेढा: सातारा येथे झालेल्या ५२ व्या हिंदकेसरी कुस्ती स्पर्धेत मानाचा ‘हिंदकेसरी’ किताब पटकावून मंगळवेढा तालुक्यातील शिरसी गावचे सुपुत्र पैलवान महेंद्र गायकवाड यांनी महाराष्ट्राच्या शिरपेचात मानाचा तुरा खोवला आहे. त्यांच्या या ऐतिहासिक यशाबद्दल आयोजित भव्य नागरी सत्कार व गौरवनिधी पुरस्कार सोहळ्यास ग्रामविकास व पंचायत राज मंत्री जयकुमार गोरे प्रमुख पाहुणे म्हणून उपस्थित होते.

यावेळी बोलताना जयकुमार गोरे यांनी महेंद्र गायकवाड यांच्या जिद्द, कठोर परिश्रम, सातत्यपूर्ण सराव आणि चिकाटीचे कौतुक केले. ग्रामीण भागातील युवकाने राष्ट्रीय स्तरावरील प्रतिष्ठेचा ‘हिंदकेसरी’ किताब मिळवणे ही संपूर्ण महाराष्ट्रासाठी अभिमानाची बाब असल्याचे त्यांनी सांगितले. अशा यशामुळे राज्यातील युवा पिढीला प्रेरणा मिळते, असेही त्यांनी नमूद केले.

महेंद्र गायकवाड यांची कामगिरी ही केवळ वैयक्तिक यश नसून मंगळवेढा तालुका आणि सोलापूर जिल्ह्याचा गौरव असल्याचे सांगत गोरे यांनी त्यांचे अभिनंदन केले. तसेच आगामी राष्ट्रीय आणि आंतरराष्ट्रीय स्पर्धांसाठी शुभेच्छा देत त्यांच्या उज्ज्वल भविष्यासाठी सदिच्छा व्यक्त केल्या.

या सत्कार सोहळ्यास आमदार समाधान आवताडे, ज्येष्ठ नेते बबनराव आवताडे, भाजप सोलापूर जिल्हाध्यक्ष शशिकांत नाना चव्हाण, दामाजी शुगरचे चेअरमन शिवानंद पाटील, आवताडे शुगर फॅक्टरीचे चेअरमन संजय आवताडे, उद्योजक वैभव नागणे, उमेश परिचारक, नगराध्यक्षा सुनंदा आवताडे, पंचायत समिती सभापती दिपाली ताड, नागरी सत्कार समितीचे अध्यक्ष प्रा. शिवाजीराव काळुंगे, उपनगराध्यक्ष येताळा भगत, उपसभापती अर्जुन मल्लाळे यांच्यासह विविध क्षेत्रांतील मान्यवर आणि नागरिक मोठ्या संख्येने उपस्थित होते.

कार्यक्रमात उपस्थितांनी हिंदकेसरी महेंद्र गायकवाड यांच्या यशाचा गौरव करत त्यांना पुढील वाटचालीसाठी शुभेच्छा दिल्या. महाराष्ट्राच्या समृद्ध कुस्ती परंपरेला नवी उंची देणाऱ्या या यशाचे सर्व स्तरांतून स्वागत आणि कौतुक करण्यात आले.