नाना केवळ महान अभिनेते नव्हते, तर सामान्यांच्या दुःखाशी जोडलेला संवेदनशील माणूस होते

नाना पाटेकर यांच्या निधनाने कलाविश्व पोरके; सचिन अहिर यांची भावपूर्ण श्रद्धांजली 

मुंबई : भारतीय चित्रपटसृष्टी आणि रंगभूमीवर आपल्या अजोड, जिवंत आणि प्रखर अभिनयाने चार दशकांहून अधिक काळ रसिकांच्या मनावर अधिराज्य गाजवणारे ज्येष्ठ अभिनेते नाना पाटेकर यांच्या निधनाने कलाविश्व पोरके झाले आहे. त्यांच्या निधनाने केवळ एक महान अभिनेता नव्हे, तर समाजाच्या दुःखाशी थेट जोडलेला अत्यंत संवेदनशील माणूस आपण गमावला आहे, अशा भावूक शब्दांत विधानपरिषदेचे उपसभापती सचिन अहिर यांनी नाना पाटेकर यांना श्रद्धांजली अर्पण केली.

नाना पाटेकर यांच्या निधनाची बातमी समोर येताच संपूर्ण सांस्कृतिक आणि सामाजिक विश्वावर शोककळा पसरली. गोव्यात त्यांच्या निधनानंतर देशभरातून श्रद्धांजली व्यक्त होत असून, त्यांच्या अभिनय कारकिर्दीबरोबरच सामाजिक कार्याचीही आठवण काढली जात आहे.

नाना पाटेकर हे केवळ पडद्यावरचे कलाकार नव्हते, तर अथांग संवेदनशीलतेचे मूर्तिमंत रूप होते, असे सांगत सचिन अहिर म्हणाले, “नटसम्राट असो वा ‘परिंदा’, ‘क्रांतीवीर’ असो वा ‘अपहरण’, त्यांनी साकारलेली प्रत्येक भूमिका प्रेक्षकांच्या काळजाचा ठाव घेणारी ठरली. त्यांच्या भारदस्त आवाजाने, संवादफेकीच्या आगळ्यावेगळ्या शैलीने आणि डोळ्यांतील थेट भिडणाऱ्या भावांनी मराठी आणि हिंदी रसिकांच्या मनात अढळ स्थान निर्माण केले.”

अभिनेता म्हणून मोठे यश आणि नावलौकिक मिळाल्यानंतरही नाना पाटेकर यांनी आपली साधी जीवनशैली आणि सामान्य माणसाशी असलेली नाळ कधीच तुटू दिली नाही. प्रसिद्धी आणि ऐश्वर्यापासून दूर राहून स्वतःची कामे स्वतः करण्याची त्यांची वृत्ती त्यांच्या व्यक्तिमत्त्वातील साधेपणा अधोरेखित करणारी होती.

नाना पाटेकर यांच्या सामाजिक बांधिलकीचाही सचिन अहिर यांनी आवर्जून उल्लेख केला. अभिनयापुरते स्वतःला मर्यादित न ठेवता त्यांनी ‘नाम फाउंडेशन’च्या माध्यमातून शेतकरी, मजूर आणि दुष्काळग्रस्तांच्या प्रश्नांसाठी काम केले. आत्महत्याग्रस्त शेतकरी कुटुंबांना मदतीचा हात देत त्यांनी सामाजिक जाणीव जपली. शेतकऱ्यांच्या अडचणी आणि ग्रामीण महाराष्ट्रातील प्रश्न शासनाच्या निदर्शनास आणून देतानाही त्यांची भूमिका ठाम राहिली. नाना पाटेकर यांच्या सामाजिक कार्यातून त्यांच्या मनातील संवेदनशील माणूस सातत्याने दिसून आला, असे अहिर यांनी नमूद केले. नाना यांच्या समाजकार्याचा उल्लेख करत अनेक नेत्यांनीही त्यांच्या शेतकरीहिताच्या कार्याला आदरांजली वाहिली आहे.

“नानांनी नेहमीच सामान्यांच्या दुःखाला आपले दुःख मानले. त्यांच्या निधनाने कलाक्षेत्राची कधीही भरून न निघणारी हानी झाली आहे. महाराष्ट्र एका कणखर, परखड आणि तरीही भावुक व्यक्तिमत्त्वाला पोरका झाला आहे. ईश्वर त्यांच्या आत्म्यास शांती देवो आणि त्यांच्या कोट्यवधी चाहत्यांसह कुटुंबीयांना हे दुःख सहन करण्याची शक्ती देवो,” अशी प्रार्थना सचिन अहिर यांनी केली.