जुनी वाहने महाग! पर्यावरण करात दुप्पट वाढ; मोटार वाहन कर सुधारणा विधेयक २०२६ मंजूर

मुंबई: राज्यातील पर्यावरण संरक्षण, आर्थिक शिस्त आणि औद्योगिक विकास यांचा समतोल साधण्यासाठी महत्त्वपूर्ण ठरणारे “महाराष्ट्र मोटार वाहन कर (सुधारणा) विधेयक, २०२६” विधिमंडळात एकमताने मंजूर करण्यात आले.

परिवहन मंत्री प्रताप सरनाईक यांनी दिलेल्या माहितीनुसार, वाढत्या वायू प्रदूषणावर नियंत्रण मिळवण्यासाठी जुन्या आणि प्रदूषणकारी वाहनांवरील पर्यावरण करात मोठी वाढ करण्यात आली आहे.

नवीन दरांनुसार

दुचाकी वाहनांसाठी कर ₹२,००० वरून ₹४,०००

पेट्रोल वाहनांसाठी ₹३,००० वरून ₹६,०००

डिझेल वाहनांसाठी ₹३,५०० वरून ₹७,०००

हा कर दर पाच वर्षांसाठी एकरकमी आकारला जाणार आहे.

या निर्णयामुळे राज्याच्या महसुलात दरवर्षी सुमारे ₹१६० कोटींपेक्षा अधिक वाढ अपेक्षित असून, हा निधी रस्ता सुरक्षा, आधुनिक परिवहन सुविधा, ATS प्रणाली आणि प्रशिक्षणासाठी वापरण्यात येणार आहे.

औद्योगिक क्षेत्राला दिलासा देत क्रेन वाहनांवरील मोटार वाहन करासाठी ₹३० लाखांची कमाल मर्यादा निश्चित करण्यात आली आहे. यामुळे बांधकाम आणि पायाभूत सुविधा क्षेत्रातील गुंतवणुकीला चालना मिळणार आहे.

या विधेयकामुळे नागरिकांना बीएस-६ आणि इलेक्ट्रिक वाहनांचा स्वीकार करण्यास प्रोत्साहन मिळणार असून राज्याच्या पर्यावरणीय धोरणाला बळकटी मिळेल. तसेच ग्रामीण व आदिवासी भागात रोजगार निर्मितीला चालना मिळण्याची शक्यता व्यक्त करण्यात आली आहे.

महत्त्वाचे म्हणजे, या निर्णयामुळे राज्याच्या एकत्रित निधीवर कोणताही अतिरिक्त भार पडणार नसून उलट महसूल वाढीस मदत होणार आहे. सभागृहातील सर्व पक्षांनी विधेयकाचे स्वागत करत एकमताने मंजुरी दिली.