ज्ञानेश हटाव, लोकशाही बचाव’; व्होटचोरीच्या आरोपावरून काँग्रेस आक्रमक

बुलढाणा: भाजप, पंतप्रधान नरेंद्र मोदी आणि केंद्रीय गृहमंत्री अमित शाह यांनी निवडणूक आयोगाच्या मदतीने कथित ‘व्होटचोरी’ केल्याचा गंभीर आरोप काँग्रेसचे प्रदेशाध्यक्ष हर्षवर्धन सपकाळ यांनी केला. या प्रकरणाची चौकशी करून मुख्य निवडणूक आयुक्त ज्ञानेशकुमार यांची हकालपट्टी करावी, त्यांच्यावर देशद्रोहाचा गुन्हा दाखल करावा तसेच नरेंद्र मोदी आणि अमित शाह यांनी देशाची माफी मागावी, अशी मागणी सपकाळ यांनी केली.

लोकशाही आणि संविधानाच्या रक्षणासाठी काँग्रेसने राज्यभर ‘लोकशाहीचा काळा दिवस’ आंदोलन केले. बुलढाणा येथील आंदोलनात सहभागी झाल्यानंतर प्रसारमाध्यमांशी बोलताना सपकाळ यांनी निवडणूक आयोगाच्या कार्यपद्धतीवरही प्रश्न उपस्थित केले.

“भाजपा सरकार हे चोरीचे सरकार आहे आणि त्यासाठी मुख्य निवडणूक आयुक्त ज्ञानेशकुमार यांनी मदत केली आहे,” असा आरोप सपकाळ यांनी केला. ‘व्होटचोरी’ आणि SIRच्या मुद्द्यावर इंडिया आघाडीचे खासदार निवडणूक आयोगाची भेट घेण्याचा प्रयत्न करत असताना त्यांना भेट दिली जात नसल्याचा दावाही त्यांनी केला.

दरम्यान, विरोधकांच्या आंदोलनादरम्यान पोलिसांकडून करण्यात आलेल्या कारवाईवरही सपकाळ यांनी टीका केली. राहुल गांधी यांच्यासह विरोधी पक्षातील खासदारांशी पोलिसांनी गैरवर्तन केल्याचा आरोप करत त्यांनी केंद्र सरकारवर लोकशाही मूल्ये आणि संविधानिक संस्थांच्या स्वायत्ततेचा प्रश्न उपस्थित केला. ‘ज्ञानेश हटाव, लोकशाही बचाव’ या घोषणेसह आंदोलन आणखी तीव्र करण्याचा इशाराही त्यांनी दिला.

मुख्यमंत्री देवेंद्र फडणवीस यांच्या टीकेला उत्तर देताना सपकाळ म्हणाले की, काँग्रेसच्या काळात निवडणूक आयोगासह विविध स्वायत्त संस्थांची उभारणी झाली. मात्र, या संस्थांवर भाजपने कब्जा केल्याचा आरोप त्यांनी केला. काँग्रेस निवडणूक आयोगाच्या कार्यपद्धतीविरोधात आंदोलन करत असताना फडणवीस यांनी आयोगाचा बचाव करण्याची गरज का भासते, असा सवालही त्यांनी उपस्थित केला.

दरम्यान, बुलढाण्यातील आंदोलनादरम्यान काँग्रेस कार्यकर्ते आणि पोलिसांमध्ये झटापट झाल्याचे वृत्त आहे. पोलिसांनी सपकाळ यांच्यासह काही कार्यकर्त्यांना ताब्यात घेतल्याचे वृत्त माध्यमांनी दिले आहे.

नांदेड, बुलढाणा, नाशिक, अमरावती, नागपूर, चिपळूणसह राज्यातील विविध जिल्ह्यांत ‘लोकशाहीचा काळा दिवस’ आंदोलन करण्यात आले. निवडणूक आयोगाविरोधातील आरोप फेटाळून आयोगाने आपले निर्णय कायदेशीर प्रक्रियेनुसार झाल्याचे यापूर्वी स्पष्ट केले आहे.ज्ञानेशकुमार यांची हकालपट्टी झाली नाही, तर आंदोलन आणखी तीव्र केले जाईल, असा इशारा काँग्रेसकडून देण्यात आला आहे.