शिरुरच्या ऋतुजा ठुबेची राष्ट्रीय नेमबाजी स्पर्धेमध्ये उत्कृष्ट कामगिरी

शिरुर (तेजस फडके): तिरुअनंतपुरम (केरळ) येथे २० नोव्हेंबर ते १० डिसेंबर २०२२ दरम्यान सुरु असलेल्या ६५ वी नॅशनल शूटिंग चॅम्पियनशिप कॉम्पिटिशन या राष्ट्रीय नेमबाजी स्पर्धेमध्ये १० मीटर पीप साईट एअर रायफल या प्रकारात ऋतुजा बाबासाहेब ठुबे हिने उत्कृष्ट कामगिरी करत मे २०२३ मध्ये होणाऱ्या ऑल इंडिया कुमार सुरेंदर सिंग शूटिंग चॅम्पियनशिप या राष्ट्रीय नेमबाजी स्पर्धेसाठी तिची निवड झाली आहे.

ऋतुजा ठुबे हिचे मूळ गाव अहमदनगर जिल्ह्यात पारनेर तालुक्यातील बाबुर्डी असुन ती शिरुर येथील सी टी बोरा महाविद्यालयात विज्ञान शाखेमध्ये पदवीच्या शेवटच्या वर्षांत शिक्षण घेत आहे. ऋतुजा हिची आई मजुरीचे काम करुन तिला या खेळासाठी प्रोत्साहित करत असते. शिरुर मधील युनिक शूटिंग स्पोर्ट्स क्लब मध्ये ती प्रशिक्षक शरद तरटे यांच्या मार्गदर्शनाखाली सराव करत आहे. तिच्या या यशाबद्दल बाबुर्डी गावच्या ग्रामस्थांनी ऋतुजाचे अभिनंदन करत आगामी आंतरराष्ट्रीय स्पर्धेसाठी शुभेच्छा दिल्या.

तसेच ठाणे शहर पोलिस उपायुक्त गणेश गावडे, शिरुर-हवेलीचे आमदार अशोक पवार, पारनेरचे आमदार निलेश लंके, माजी जिल्हा परिषद सदस्य राहुल पाचर्णे, नगरसेवक नितिन पाचर्णे शिवसेना ठाकरे गटाचे शिरुर-आंबेगाव तालुका प्रमुख गणेश जामदार, महाराष्ट्र राज्य मराठी पत्रकार संघाचे शिरूर तालुका अध्यक्ष अर्जुन बढे, भाजपा पारनेर तालुका उपाध्यक्ष काशिनाथ नवले, गजानन गावडे यांनीही ऋतुजा ठुबे हिचे अभिनंदन केले आहे.