शिरुर तालुक्यात कंपनीत जाणाऱ्या कामगारांचे हातपाय बांधून लुटले…

रात्रीत दोन कामगारांना लुटल्याने कामगार भयभीत

शिक्रापूर (शेरखान शेख): वाजेवाडी (ता. शिरुर) येथील कोरेगाव भीमा चौफुला रोडवरून रात्रीच्या सुमारास कंपनीत जाणाऱ्या कामगाराला मारहाण करत त्याचे हातपाय बांधून दुचाकी मोबाईल सह आदी वस्तू लुटून अजूनही एका कामगाराला मारहाण करत लुटल्याची घटना घडली असल्याने शिक्रापूर पोलीस स्टेशन तीन अज्ञात चोरट्यांवर गुन्हे दाखल करण्यात आले आहे.

वाजेवाडी (ता. शिरुर) येथील कोरेगाव भीमा चौफुला रोडवरून रात्रीच्या सुमारास संकल्प फिर्जींग कंपनीचा कामगार हरिष जगताप हा त्याच्या ताब्यातील एम एच १२ एम एस ९७१५ या दुचाकीहून येत असताना 3 अज्ञात युवकांनी त्याला अडवून शिवीगाळ, दमदाटी करत शेजारील शेतात घेऊन जात त्याचे कपडे काढून त्याच्यात कपड्याने त्याचे हातपाय बांधून ठेवत त्याच्या जवळील मोबाईल, रोख रक्कम, एटीएम कार्ड काढून घेत मोबाईल वरुन ऑनलाईन रक्कम पाठवण्याचा पासवर्ड विचारून रक्कम पाठवली. मात्र रक्कम सेंड न झाल्याने त्याच्या एटीएमचा पासवर्ड विचारून घेत त्याचीची दुचाकी घेऊन तिघेजण गेले.

मात्र पुन्हा सदर इसमांनी त्या रस्त्याने येणाऱ्या वढू बुद्रुक येथील संकेत नामदेव भंडारी या युवकाला देखील मारहाण करत त्याच्याजवळील रक्कम व मोबाईल चोरुन नेला. मात्र हरिष जगताप या कामगाराला शेतातच दमदाटी करत हातपाय बांधून ठेवून तिघेजण निघून गेले.  त्यावेळी हरिष याने स्वतःची सुटका करुन घेत जवळ असलेल्या एका घराकडे जात घडलेला प्रकार त्यांना सांगत पोलीस स्टेशन गाठले.

याबाबत हरिष पुंडलिक जगताप (वय ३४) रा. राम नगर पेरणे फाटा ता. हवेली जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात 3 युवकांवर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली सहाय्यक पोलीस निरीक्षक वैभव पवार व पोलीस शिपाई निरज पिसाळ हे करत आहे.