वाघोलीत रक्तरंजित सकाळ! आईकडून पोटच्या मुलाची गळा चिरून निर्घृण हत्या, मुलीवर प्राणघातक हल्ला

परिसरात खळबळ, आरोपी आई पोलिसांच्या ताब्यात

पुणे (वाघोली): वाघोली परिसरातील बायफ रोडजवळील ऑलिव्ह सोसायटीलगत असलेल्या गल्लीत मंगळवारी सकाळी एक धक्कादायक घटना घडली. आईनेच आपल्या ११ वर्षीय पोटच्या मुलाचा गळा चिरून निर्घृण हत्या केली असून, त्यानंतर १३ वर्षीय मुलीवरही प्राणघातक हल्ला केल्याचा प्रकार समोर आला आहे. मात्र मुलगी जोरात ओरडत घराबाहेर पळाल्याने तिचा जीव वाचला. सध्या जखमी मुलीवर रुग्णालयात उपचार सुरू आहेत.

या घटनेत साईराज संतोष जायभाय (वय ११) याचा जागीच मृत्यू झाला आहे. तर धनश्री संतोष जायभाय (वय १३) ही आईच्या हल्ल्यात गंभीर जखमी झाली आहे. आरोपी महिलेचं नाव सोनी संतोष जायभाय असून ती मूळची कंधार, जिल्हा नांदेड येथील रहिवासी आहे. सध्या ती वाघोलीतील बायफ रोड परिसरात वास्तव्यास होती.

मिळालेल्या माहितीनुसार, सकाळी साडे आठच्या सुमारास ही घटना घडली. मुलाचा गळा चिरल्यानंतर घरातील खोलीत मोठ्या प्रमाणात रक्त सांडलेले होते. घटनास्थळी आरोपी आई हात-पाय रक्ताने माखलेल्या अवस्थेत बसलेली असल्याचं प्रत्यक्षदर्शींनी सांगितलं.घटनेची माहिती मिळताच पोलिसांनी तातडीने घटनास्थळी धाव घेत आरोपी महिलेला ताब्यात घेतले. जखमी मुलीला तात्काळ उपचारासाठी रुग्णालयात दाखल करण्यात आलं आहे. या घटनेमुळे संपूर्ण परिसरात भीती आणि तणावाचं वातावरण निर्माण झालं आहे.

ही हत्या नेमक्या कोणत्या कारणामुळे करण्यात आली, याचा तपास पोलीस करत आहेत. कौटुंबिक वाद, मानसिक तणाव किंवा अन्य काही कारण आहे का, याचा शोध घेण्यात येत असून पुढील तपास सुरू आहे.वाघोली परिसरात सातत्याने घडणाऱ्या गुन्हेगारी घटनांमुळे नागरिकांमध्ये असुरक्षिततेची भावना वाढत असून, पोलिसांनी याकडे गांभीर्याने लक्ष देण्याची मागणी स्थानिकांकडून होत आहे.