चौथ्या मजल्यावरून पडून सहा वर्षांच्या चिमुरड्याचा दुर्दैवी मृत्यू

नाशिक: नाशिक शहरात एक हृदयद्रावक घटना घडली असून, खेळता खेळता इमारतीच्या चौथ्या मजल्यावरून खाली पडून सहा वर्षांच्या चिमुरड्याचा दुर्दैवी मृत्यू झाला आहे. या घटनेमुळे पाथर्डी फाटा परिसरात शोककळा पसरली आहे.

पाथर्डी फाटा येथील नरहरी नगर परिसरातील एका इमारतीत ही दुर्दैवी घटना रविवारी सायंकाळच्या सुमारास घडली. कियान्श प्रफुल्ल बेदाडे (वय ६ वर्षे, रा. शिवगंगा रेबिन्यू, नरहरी नगर, पाथर्डी फाटा, नाशिक) असे मृत बालकाचे नाव आहे.

मिळालेल्या माहितीनुसार, कियान्श हा आपल्या इमारतीच्या चौथ्या मजल्यावरील घराच्या गॅलरीमध्ये खेळत होता. खेळताना अचानक त्याचा तोल गेला आणि तो थेट खाली जमिनीवर कोसळला. चौथ्या मजल्यावरून पडल्याने तो गंभीर जखमी झाला होता.

घटना लक्षात येताच कुटुंबीयांनी तातडीने त्याला उपचारासाठी रुग्णालयात दाखल केले. मात्र, डॉक्टरांनी त्याला मृत घोषित केले. या घटनेने बेदाडे कुटुंबावर दुःखाचा डोंगर कोसळला आहे.

घटनेची माहिती मिळताच परिसरातील नागरिकांनी घटनास्थळी मोठी गर्दी केली होती. कियान्शच्या आईने फोडलेला हंबरडा उपस्थितांचे काळीज पिळवटून टाकणारा होता. कियान्श हा आपल्या आई व दोन बहिणींसोबत नाशिकमध्ये राहत होता, तर त्याचे वडील कामानिमित्त मनमाड येथे वास्तव्यास आहेत. कियान्श हा बेदाडे कुटुंबातील एकुलता एक मुलगा होता.या प्रकरणी इंदिरानगर पोलीस ठाण्यात आकस्मात मृत्यूची नोंद करण्यात आली असून पुढील तपास इंदिरानगर पोलीस करत आहेत.