शिरुर तालुक्यात हत्यारांच्या धाकाने दोन कुटुंबांना लुटले

शिक्रापूर (शेरखान शेख): कोंढापुरी (ता. शिरुर) येथे 2 घरात रात्री अडीच वाजण्याच्या सुमारास घुसून तिघा अज्ञात चोरट्यांनी हत्यारांचा धाक दाखवून घरातील दागिने व रोख रक्कम लुटून नेल्याची घटना घडली असल्याने शिक्रापूर पोलीस स्टेशन येथे 3 अज्ञात चोरट्यांवर गुन्हे दाखल करण्यात आले आहे.

कोंढापुरी (ता. शिरुर) येथील कवठीमळा येथे राहणारे संतोष जगताप हे कुटुंबियांसह घरात झोपेले असताना रात्री अडीच वाजण्याच्या सुमारास 3 अज्ञात चोरट्यांनी त्यांच्या घराच्या दरवाजावर काहीतरी मारुन दरवाजातून आतमध्ये आले. त्यांनी जगताप यांच्यासह त्यांच्या पत्नीला कोयत्याचा धाक दाखवत पत्नीच्या अंगावरील तसेच कपाटातील सोन्या चांदीचे दागिने व कपाटातील 50 हजार रुपये आणि दोघांचे मोबाईल काढून घेत दोघांना दमदाटी करत घरातून बाहेर जात घराला बाहेरुन कडी लावून घेतली.

याचवेळी जगताप यांच्या शेजारी राहणाऱ्या गणेश घरत यांच्या घराचा देखील दरवाजा उघडून गणेश व त्यांच्या आईला कोयत्याचा धाक दाखवत त्यांच्या कपाटातील सोन्या चांदीचे दागिने व 10 हजार रुपये रोख रक्कम काढून तिघांनी तब्बल 3 लाखांचा ऐवज लुटून तेथून पोबारा केला. घडलेल्या घटनेबाबत संतोष उत्तरेश्वर जगताप (वय ३७) कवठीमळा कोंढापुरी (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी 3 अज्ञात चोरट्यांवर गुन्हे दाखल केले आहेत.

सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस निरीक्षक नितीन अतकरे व पोलीस नाईक रोहिदास पारखे हे करत आहे.