शिरुरमध्ये दरवाजाचे कुलूप तोडून दागिने व रक्कम लंपास

शिक्रापूर (शेरखान शेख): शिरुर शहरातील रामलिंग रोड येथील रुद्रा कॉलनी मधील एका व्यक्तीच्या दरवाजाचे कुलूप तोडून अज्ञात चोरट्याने घरातील सोन्याचे दागिने व रोख रक्कम चोरुन नेल्याची घटना घडली असल्याने शिरुर पोलीस स्टेशन येथे अज्ञात चोरट्यावर गुन्हे दाखल करण्यात आले आहे.

शिरुर शहरातील रामलिंग रोड येथील रुद्रा कॉलनी येथे राहणारे विलास घोलप हे घराला कुलूप लावून १६ डिसेंबर २०२२ रोजी गावाला गेलेले होते, ३ जानेवारी रोजी सायंकाळ च्या सुमारास घोलप गे गावाहून घरी आले असता त्यांच्या घराच्या दरवाजाचे कुलूप तुटलेले असल्याचे आणि कपाट उघडे व घरातील साहित्य अस्थाव्यस्थ पडलेले असल्याचे घोलप यांना दिसून आले. यावेळी घोलप यांनी घरातील कपाटाची पाहणी केली असता कपाटातील दीड तोळा वजनाचे सोन्याचे दागिने आणि रोख 3 हजार रुपये असा ऐवज चोरीला गेला असल्याचे घोलप यांना दिसले.

याबाबत विलास मोतीराम घोलप (वय ४०) रा. शिरुर रामलिंग रोड रुद्रा कॉलनी, साई नगर ता. शिरुर जि. पुणे मूळ रा. जवळगा ता. निलंगा जि. लातूर यांनी शिरुर पोलीस स्टेशन येथे फिर्याद दिली असल्याने शिरुर पोलिसांनी अज्ञात चोरट्यावर गुन्हे दाखल केले असून पुढील तपास पोलीस निरीक्षक सुरेशकुमार राऊत यांच्या मार्गदर्शनाखाली पोलीस नाईक श्रीनाथ जगताप हे करत आहे.