लोणी काळभोरमध्ये वैवाहिक आणि मानसिक छळ प्रकरण; पतीसह १० जणांविरोधात गुन्हा

पुणे: लोणी काळभोर पोलीस ठाण्यात एका पिडीत महिलेकडून पतीसह दहा जणांविरोधात गुन्हा दाखल करण्यात आला आहे. फिर्यादीनुसार, पिडीत पत्नीच्या वैध विवाहाचे कायदेशीर नाते अस्तित्वात असताना पती सिद्धेश्वर नामदेव काळभोर यांनी जाणीवपूर्वक दुसऱ्या महिलेशी, पुनम बाबुराव गायकवाड यांच्यासोबत, दुसरे लग्न केले व सहजीवन सुरू केले.

पिडीतेच्या तक्रारीनुसार, पतीने दुसऱ्या पत्नीच्या नावासह तिचे फोटो आणि स्टेटस सोशल मीडियावर अपलोड करून तिला मानसिक छळ केला. या प्रकारामुळे तिची बदनामी होऊन तिच्या दोन मुलांवरही मानसिक परिणाम झाला आहे.

पोलिसांनी दिलेल्या माहितीनुसार, पिडीतेने दिलेल्या फिर्यादीत म्हटले आहे की, २३ जून २०२० पासून पती व दुसऱ्या पत्नीने अश्लील व्हॉट्सॲप मेसेज पाठवून तिच्या सन्मानाचे उल्लंघन केले. तसेच, पतीचे नातेवाईक देखील या छळात सहभागी असल्याचे तक्रारीत नमूद आहे.

विशेष म्हणजे दुसरी पत्नी, पुनम गायकवाड, सध्या जिल्हा परिषद निवडणुकीत एका राष्ट्रीय पक्षाकडून उमेदवारीसाठी प्रचार करत आहे, आणि या प्रकरणामुळे सामाजिक व राजकीय वाद निर्माण होण्याची शक्यता आहे.पोलीसांनी या प्रकरणी पिडीत पत्नीच्या तक्रारीनुसार विविध कलमान्वये गुन्हा नोंदवला आहे आणि सखोल चौकशी सुरु आहे.