उच्च न्यायालयातील ज्येष्ठ महिला वकिलाचा संशयास्पद मृत्यू

बिहार: बिहारची राजधानी पाटणा येथे खळबळ उडवणारी घटना उघडकीस आली आहे. पाटणा उच्च न्यायालय येथे कार्यरत असलेल्या ज्येष्ठ महिला वकील इंदिरा लक्ष्मी (वय ६०) यांचा अर्धवट जळालेल्या अवस्थेतील मृतदेह त्यांच्या राहत्या घरात आढळून आला.

ही घटना कदम कुआं पोलीस ठाणे हद्दीतील राजेंद्र नगर, रोड क्रमांक २ येथे घडली. मृतदेह सापडताच परिसरात एकच खळबळ उडाली. माहिती मिळताच पोलिसांचे पथक तातडीने घटनास्थळी दाखल झाले.

एकट्याच राहत होत्या

इंदिरा लक्ष्मी या पाटणा उच्च न्यायालय तसेच दिवाणी न्यायालयात वकील म्हणून कार्यरत होत्या. त्या कायदेशीर क्षेत्रात सक्रिय होत्या. त्या घरात एकट्याच राहत होत्या, तर त्यांचे पती रांची येथे वास्तव्यास असल्याची माहिती आहे.

बुधवारी त्यांचा मृतदेह घरात आढळल्यानंतर पोलिसांनी तो ताब्यात घेऊन शवविच्छेदनासाठी पाठवला आहे. घटनास्थळी फॉरेन्सिक पथक (एफएसएल) दाखल झाले असून पुरावे गोळा करण्यात आले आहेत.

प्राथमिक तपासात हे प्रकरण संशयास्पद असल्याचे पोलिस सूत्रांनी सांगितले आहे. अद्याप अधिकृत निवेदन जारी करण्यात आलेले नसून सर्व बाजूंनी तपास सुरू आहे. या घटनेमुळे न्यायालयीन वर्तुळातही हळहळ व्यक्त होत आहे.