करंदीत अखंड हरीनाम सप्ताह उत्साहात संपन्न

शिक्रापुर (शेरखान शेख) करंदी (ता.शिरुर) येथे श्रीकृष्ण जन्माष्टमी आणि मंदिराच्या वर्धापनदिना निमित्त अखंड हरीनाम सप्ताह तसेच ज्ञानेश्वरी पारायण सोहळा उत्साहात संपन्न झाला असून आठवडाभर सुरु असलेल्या या सप्ताहास नागरिकांसह महिलांनी देखील उस्फुर्त प्रतिसाद दिल्याचे दिसून आले तर श्रीकृष्ण जन्म दरम्यान श्रीकृष्णाची वेशभूषा परिधान केलेल्या बालचमूने सर्वांचे लक्ष वेधून घेतले.

करंदी (दि १२) ऑगस्ट पासून हरीनाम सप्ताह तसेच ज्ञानेश्वरी पारायण सोहळ्याचे आयोजन करण्यात आले होते. यावेळी ग्रामस्थांच्या वतीने आठवडाभर काकड आरती, पारायण, प्रवचन तसेच कीर्तनासह महाप्रसादाचे आयोजन करण्यात आले असताना अनुक्रमे ह. भ. प. मारुती महाराज ढोकले, राहुल महाराज पाटील, दिगंबर महाराज ढोकले, बबन महाराज साकोरे, शिवाजी महाराज दरेकर, गुलाबराव डाळिंबकर सर, कु. प्राजक्ता झेंडे यांचे प्रवचन तर ह. भ. प. गणेश महाराज फरताळे, दिगंबर महाराज जाधव, सुप्रियाताई साठे – ठाकूर, उल्हास महाराज सूर्यवंशी, ज्ञानेश्वर महाराज दौंडकर, शंकर महाराज शिंदे, नवनाथ महाराज माशिरे यांचे कीर्तन संपन्न झाले तर वैभव महाराज ढोकले यांचे काल्याचे कीर्तन संपन्न झाले.

सलग आठवडाभर सुरु असलेल्या या सप्ताहामुळे गावामध्ये चैतन्यमय वातावरण निर्माण झाले होते तर दररोज ग्रामस्थांसह महिलांचा देखील मोठ्या प्रमाणात सहभाग होता, या सप्ताहवेळी दररोज पोलीस पाटील वंदना महेश साबळे यांच्याकडून कीर्तनकार यांना मान्यवरांच्या हस्ते विशेष सन्मानचिन्ह देत सन्मानित करण्यात आले. श्रीकृष्ण जन्म दरम्यान गावातील गोपी ढोकले या बालकाने श्रीकृष्णाची वेशभूषा परिधान केलेल्या त्याने सर्वांचे लक्ष वेधून घेतले. सदर सप्ताह संपन्न होण्यासाठी सर्व ग्रामस्थांसह पदाधिकाऱ्यांनी विशेष परिश्रम घेतले.
.