जेलमधून बाहेर आल्यानंतर राजपाल यादव पुन्हा मोठ्या पडद्यावर

मुंबई: चेक बाऊंस प्रकरणामुळे तुरुंगात गेलेले विनोदी अभिनेता राजपाल यादव काही दिवसांपूर्वी जामिनावर बाहेर आले आहेत. जेलमधून सुटल्यानंतर पुन्हा काम करण्याची इच्छा त्यांनी व्यक्त केली होती. दरम्यान आता त्यांच्या चाहत्यांसाठी आनंदाची बातमी समोर आली असून, त्यांचा नवा चित्रपट लवकरच प्रेक्षकांच्या भेटीला येणार आहे.

अभिनेता अक्षय कुमार याच्या बहुप्रतिक्षित भूत बांगला या चित्रपटाचा टीझर प्रदर्शित झाला आहे. 1 मिनिट 23 सेकंदांच्या या हॉरर-कॉमेडी टीझरमध्ये अक्षय कुमार, परेश रावल आणि राजपाल यादव यांच्या जबरदस्त कॉमिक टायमिंगची झलक पाहायला मिळते. चित्रपटात तब्बू, वामिका गब्बी, जिसू सेनगुप्ता यांच्याही महत्त्वाच्या भूमिका आहेत. तसेच ज्येष्ठ अभिनेते असरानी देखील या चित्रपटात दिसणार असून हा त्यांचा शेवटचा चित्रपट असल्याचे सांगितले जात आहे.

टीझरची सुरुवात एका भयावह रात्रीने होते. बॅकग्राऊंडमध्ये असरानी यांचा आवाज ऐकू येतो. त्यानंतर अक्षय कुमार, परेश रावल आणि राजपाल यादव यांचे त्रिकूट एका गूढ घटनेचा शोध घेताना दिसते. अक्षय कुमार राजपाल यादवला थप्पड मारतानाचा प्रसंग आणि तिघांमधील संवाद प्रेक्षकांना खळखळून हसवतात.

टीझरमध्ये हे तिघे एका जुन्या महालात प्रवेश करताना दाखवले आहेत. या महालाची झलक पाहून 2007 मधील सुपरहिट चित्रपट भूल भुलैया ची आठवण येते. त्यानंतर तब्बू आणि वामिका गब्बी यांच्या एन्ट्रीने कथेला आणखी रहस्याची जोड मिळते.

विशेष म्हणजे दिग्दर्शक प्रियदर्शन आणि अक्षय कुमार तब्बल 14 वर्षांनंतर पुन्हा एकत्र काम करत आहेत. त्यांच्या जोडीने याआधी अनेक हिट कॉमेडी चित्रपट दिले असल्याने चाहत्यांमध्ये या चित्रपटाबद्दल उत्सुकता वाढली आहे.भूत बांगला हा चित्रपट 10 एप्रिल रोजी प्रदर्शित होणार आहे. सुरुवातीला तो 19 मार्चला रिलीज होणार होता, मात्र धुरंधर 2 मुळे चित्रपटाची रिलीज डेट पुढे ढकलण्यात आली.