शिरूर तालुक्यातील धोकादायक व्यक्ती एम.पी.डी.ए. कायद्यान्वये कारागृहात स्थानबद्ध

निवडणूक पार्श्वभूमीवर पुणे ग्रामीण पोलिसांची ठोस कारवाई

शिरूर (अरुणकुमार मोटे): आगामी परिषद व पंचायत समितीच्या निवडणुका,स्थानिक स्वराज्य संस्था निवडणुक शांततेत, भयमुक्त वातावरणात पार पडाव्यात, यासाठी पुणे ग्रामीण पोलीस दलाने गुन्हेगारीविरोधात कडक पावले उचलली आहेत. त्याच अनुषंगाने शिरूर तालुक्यातील सराईत व धोकादायक इसमाला महाराष्ट्र प्रतिबंधक नजरकैद कायदा (एम.पी.डी.ए.) अंतर्गत कारागृहात स्थानबद्ध करण्यात आले आहे.

पुणे ग्रामीणचे पोलीस अधीक्षक संदीप सिंह गिल्ल यांच्या मार्गदर्शनाखाली जिल्ह्यात अवैध शस्त्र बाळगणारे, वाळू तस्कर, महिलांविरोधातील गुन्हे करणारे, सार्वजनिक सुव्यवस्थेला बाधा आणणारे तसेच सराईत गुन्हेगारांविरुद्ध विशेष मोहिम राबविण्यात येत आहे. याच मोहिमेअंतर्गत शिरूर पोलीस स्टेशन हद्दीतील गोलेगाव येथील रहिवासी दिपक बबन गुंजाळ (वय ३३) याच्यावर एम.पी.डी.ए. अंतर्गत कारवाई करण्यात आली.

सदर व्यक्तीविरुद्ध यापूर्वी बेकायदेशीर अग्नीशस्त्र बाळगणे, संगनमत करून घातक हत्यारांनी मारहाण करणे, जबर दुखापत पोहोचवणे, शिवीगाळ व दमदाटी करणे अशा स्वरूपाचे तीन गंभीर गुन्हे दाखल होते. तो सराईत व धोकादायक असल्याने शिरूर पोलीस स्टेशनचे पोलीस निरीक्षक संदेश केंजळे यांनी त्याच्याविरुद्ध एम.पी.डी.ए. अंतर्गत कारवाईचा प्रस्ताव पोलीस अधीक्षकांकडे सादर केला होता.

या प्रस्तावाचे परीक्षण करून पोलीस अधीक्षक संदीप सिंह गिल्ल यांनी तो पुढील कार्यवाहीसाठी पुणे जिल्हाधिकारी तथा जिल्हादंडाधिकारी यांच्याकडे पाठविला. त्यानुसार जिल्हाधिकारी तथा जिल्हादंडाधिकारी पुणे जितेंद्र डुडी यांनी सार्वजनिक सुव्यवस्थेला धोका निर्माण होऊ नये, या दृष्टीने एम.पी.डी.ए. कायदा १९८१ (सुधारित अधिनियम २०२५) अन्वये दिपक गुंजाळ याला स्थानबद्ध करण्याचा आदेश पारित केला.

जिल्हादंडाधिकाऱ्यांच्या आदेशान्वये शिरूर पोलीस स्टेशन व स्थानिक गुन्हे शाखेच्या स्वतंत्र पथकांनी संयुक्त कारवाई करत दिनांक १३ डिसेंबर २०२५ रोजी दिपक गुंजाळ यास ताब्यात घेऊन मध्यवर्ती कारागृह, नागपूर येथे दाखल केले. त्यामुळे शिरूर शहर व तालुक्यात गुन्हेगारी प्रवृत्तीवर मोठा आळा बसला असून नागरिकांनी सुटकेचा श्वास घेतला आहे.

ही कारवाई अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, शिरूर पोलीस स्टेशनचे पोलीस निरीक्षक संदेश केंजळे यांच्यासह पोलीस उपनिरीक्षक, सहाय्यक पोलीस उपनिरीक्षक व पोलीस अधिकारी-अंमलदारांच्या पथकाने यशस्वीपणे पार पाडली.

निवडणुकीच्या पार्श्वभूमीवर अशा कठोर कारवायांमुळे गुन्हेगारांमध्ये भीतीचे वातावरण निर्माण झाले असून, शिरूर तालुक्यात कायदा व सुव्यवस्था अबाधित राखण्यासाठी पुणे ग्रामीण पोलीस दल कटिबद्ध असल्याचा स्पष्ट संदेश या कारवाईतून देण्यात आला आहे.