शिरूर! रांजणगाव गणपती परिसरात स्फोटाच्या धक्क्याने घरांना तडे; पाहा Video…

शिरूर (तेजस फडके): शिरूर तालुक्यातील रांजणगाव गणपती तसेच पिंपरी दुमाला परिसरात सोमवारी (ता. २) अचानक मोठा स्फोट झाल्याची घटना घडली. या स्फोटाच्या धक्क्याने काही घरांना तडे गेल्याची प्राथमिक माहिती समोर आली असून, परिसरातील नागरिकांमध्ये भीतीचे वातावरण निर्माण झाले आहे.

प्रत्यक्षदर्शींनी सांगितले की, स्फोटाचा आवाज अतिशय मोठा होता आणि काही क्षण जमिनीला कंपन जाणवले. त्यामुळे अनेक नागरिक घराबाहेर धावत आले. काही घरांच्या भिंतींना किरकोळ तडे गेल्याचे दिसून आले. सुदैवाने या घटनेत जीवितहानी झाल्याची माहिती नाही; मात्र नागरिक भयभीत झाले आहेत. संबंधित व्हिडिओ सोशल मीडियावर व्हायरल झाल्यानंतर अनेकजण प्रतिक्रियांच्या माध्यमातून व्यक्त होत आहेत.

प्रशासनाकडून माहिती घेण्याचा प्रयत्न केला असता, भूकंपाची शक्यता स्पष्टपणे नाकारण्यात आली आहे. प्राथमिक तपासात हा भूकंपाचा धक्का नसल्याचे सांगण्यात आले असून, अन्य कारणांचा शोध घेतला जात आहे. प्रशासनाने या घटनेची माहिती जिल्हा प्रशासनाला कळवली असून, संबंधित विभागांकडून सविस्तर अहवाल मागवण्यात आला आहे. तज्ञ पथकांकडून परिसराची पाहणी करून स्फोटाचे नेमके कारण शोधले जाणार असल्याचे सांगण्यात आले.

दरम्यान, नागरिकांनी अफवांवर विश्वास ठेवू नये आणि कोणतीही अप्रमाणित माहिती सोशल मीडियावर प्रसारित करू नये, असे आवाहन प्रशासनाकडून करण्यात आले आहे. परिस्थितीवर बारकाईने लक्ष ठेवण्यात येत असून, पुढील घडामोडींबाबत अधिकृत माहिती लवकरच जाहीर केली जाणार आहे.

पुणे ते छ. संभाजीनगर महामार्गाच्या प्रकल्पाच्या कामाला अखेर वेग; खराडी ते शिरूर…

अजित पवार यांच्यावर स्मरणग्रंथ होणार प्रकाशित; शिरूरकरांना आठवणी पाठविण्याचे आवाहन…