उन्हात घराबाहेर जात नाही मग व्हिटॅमिन D मिळणार कस, ४ पदार्थ खा- तब्येत राहील ठणठणीत

तब्येत ठणठणीत ठेवायची असेल तर आपल्या आहारात सगळे पौष्टिक घटक पाहिजेतच. व्हिटॅमिन डी हा सुद्धा एक असाच अतिशय महत्त्वाचा घटक. हाडं मजबूत ठेवण्यासाठी तो उपयुक्त ठरतो. त्याशिवाय जर शरीरात व्हिटॅमिन डी ची कमतरता असेल तर केस गळायला लागतात, नखं तुटतात, रोगप्रतिकारक शक्ती कमी होत जाते आणि चेतना संस्थेवरही त्याचा परिणाम होतो. त्यामुळे शरीराला पुरेशा प्रमाणात व्हिटॅमिन डी मिळायला हवं. आता आपल्याला हे माहितीच आहे की सकाळचे कोवळे ऊन हे व्हिटॅमिन डी चा सगळ्यात उत्तम स्त्रोत आहे. पण बहुतांश लोकांचं त्या वेळेत घराबाहेर पडणं होत नाही. शिवाय जे बाहेर पडतात त्यांनी सनकोट, स्कार्फ, गॉगल असं सगळं घालून शरीर पुर्णपणे झाकून घेतलेलं असतं. मग अशावेळी शरीराला व्हिटॅमिन डी मिळणार कसं म्हणूनच तुमच्या आहारात हे काही पदार्थ नियमित असू द्या जेणेकरून शरीरातील व्हिटॅमिन डी ची कमतरता दूर होईल.

व्हिटॅमिन डी भरपूर प्रमाणात असणारे पदार्थ

1) मशरूम: इंटरनॅशनल सेंटर फॉर कॉस्मेटिक मेडिसिन यांनी मांडलेल्या अभ्यासानुसार मशरूम हा व्हिटॅमिन डी चा एक उत्तम स्त्रोत आहे. मशरूमचे आणखी एक वैशिष्ट्य असे की त्यामध्ये कॅलरी खूप कमी प्रमाणात असतात. त्यामुळे वजन वाढण्याचाही धोका नसतो. त्यामुळे मशरूमचे पदार्थ तुमच्या आहारात नियमितपणे असू द्या..

2) संत्री: संत्रीमध्ये व्हिटॅमिन सी भरपूर प्रमाणात असतं हे आपल्याला माहितीच आहे. पण त्यासोबतच त्यामध्ये व्हिटॅमिन D limonene हा घटकही असतो. त्यामुळे व्हिटॅमिन डी आणि सी हे दोन्ही देणारं संत्र नियमितपणे खायलाच हवं.

3) चीज: व्हिटॅमिन डी चांगल्या प्रमाणात देणारं चीज लहान मुलांच्याही अतिशय आवडीचं असतं. त्यामुळे वेगवेगळ्या पदार्थांच्या माध्यमातून चीज खा आणि मुलांनाही खाऊ घाला.

4) दूध: दूधामधूनही चांगल्या प्रमाणात व्हिटॅमिन डी मिळतं. त्यासोबतच पनीर, तूप या पदार्थांमधूनही व्हिटॅमिन डी मिळते.

(सोशल मीडियावरून साभार)