१५०० कोटींचा जैवठेवा खासगीकडे? हाफकिनच्या निर्णयावर वडेट्टीवारांचा आक्षेप

मुंबई: हाफकिन संस्था कडे असलेला DPT लस तयार करण्यासाठीचा स्टेन हा अत्यंत दुर्मिळ आणि ऐतिहासिक जैव-संपत्तीचा ठेवा असल्याचा मुद्दा उपस्थित करत विजय वडेट्टीवार यांनी विधानसभेत आक्षेप नोंदवला.

रिलायन्स लाईफ सायन्सेस या खाजगी कंपनीने प्रस्ताव दिल्यानंतर, कोणतीही सखोल विचारणा न करता हाफकिनने थेट Expression of Interest (EOI) मागवण्याची प्रक्रिया सुरू केल्याचे त्यांनी नमूद केले.हाफकिनसारखी सक्षम संस्था स्वतः लस उत्पादन करू शकत असताना, तब्बल १५०० कोटी रुपयांचा मौल्यवान जैवठेवा खाजगी कंपनीच्या हातात का दिला जात आहे, असा थेट सवाल वडेट्टीवार यांनी उपस्थित केला.

ते पुढे म्हणाले की, हाफकिन संस्था आजपर्यंत सर्वसामान्यांसाठी स्वस्त दरात लसी उपलब्ध करून देत आली आहे. मात्र, जर हा ठेवा खासगी कंपनीकडे गेला, तर लसींचे दर वाढण्याची शक्यता असून याचा थेट परिणाम सार्वजनिक आरोग्य व्यवस्थेवर होऊ शकतो.

राज्याच्या महत्त्वाच्या जैव-संपत्तीवर खाजगी नियंत्रण येणे हा धोक्याचा इशारा असल्याचे सांगत, ही प्रक्रिया तात्काळ स्थगित करावी, अशी मागणी त्यांनी केली.तसेच, हाफकिन संस्थेला स्वतःचे लस उत्पादन वाढवण्यासाठी प्रोत्साहन व प्राधान्य द्यावे, अशी भूमिका त्यांनी ‘पॉईंट ऑफ इन्फॉर्मेशन’च्या माध्यमातून मांडली.