रस्त्यात बंद पडलेल्या रुग्णवाहिकेतील रुग्णाला मुख्यमंत्री एकनाथ शिंदेंनी ताफा थांबवून केली मदत

ठाणे: मुख्यमंत्री एकनाथ शिंदे यांचा संवेदनशीलपणाचा प्रत्यय पुन्हा एकदा पहायला मिळाला. गडचिरोली येथील आपला नियोजित दौरा आटोपून ठाण्याकडे परतत असताना मुख्यमंत्र्यांना अचानक एक रुग्णवाहिका बंद अवस्थेत उभी असलेली दिसली. चुनाभट्टी – कुर्ला येथील पुलावर ही रुग्णवाहिका बंद पडलेली पाहून मुख्यमंत्र्यांनी तातडीने त्यांच्या गाड्यांचा ताफा थांबवून या रुग्णवाहिकेची चौकशी केली. यावेळी या रुग्णाचे नाव धर्मा सोनवणे असे असून त्याला नाशिकहून मुंबईत उपचारासाठी रुग्णवाहिकेतून आणण्यात आले असल्याचे त्याना समजले. मात्र या रुग्णाला दाखल करून घ्यायला नकार दिल्याने त्याला पुन्हा नाशिककडे घेऊन जात असल्याचे त्यांच्या नातेवाईकांनी मुख्यमंत्री शिंदे यांना सांगितले.

अखेर क्षणाचाही विलंब न करता मुख्यमंत्र्यांनी ठाणे जिल्हा रुग्णालयाचे जिल्हा शल्यचिकीत्सक डॉ कैलास पवार यांस फोन करून या रुग्णाला दाखल करण्यास सांगितले. परंतु या अपघातग्रस्त रुग्णास हृदयविकाराचाही सौम्य झटका आला असल्याकारणाने मुख्यमंत्री महोदयांच्या आदेशानुसार विशेष उपचारासाठी मुख्यमंत्री वैद्यकीय सहायता निधीचे प्रमुख मंगेश चिवटे यांनी तात्काळ सिव्हिल रुग्णालयामधून ठाण्यामधील सर्व सोयीयुक्त असलेला अद्ययावत कायझेन रुग्णालयमध्ये एडमिट करण्यात आले. यावेळी मुख्यमंत्री सहायता निधीचे प्रमुख मंगेश चिवटे जातीने हजर होते.

तसेच संवेदनशील मुख्यमंत्री एकनाथजी शिंदे साहेब यांच्या निर्देशानुसार रुग्णाचा संपूर्ण खर्च मुख्यमंत्री वैद्यकीय सहायता निधी मधून केला जाईल असे मुख्यमंत्री वैद्यकीय सहायता निधीचे प्रमुख मंगेश चिवटे यांनी जाहीर केले. मुख्यमंत्र्यांनी ताफा थांबवून आपली अडचण समजून घेऊन तत्परतेने मदत केलेली पाहुन सोनवणे यांच्या कुटूंबियांनी मुख्यमंत्र्यांचे आभार मानले. यानिमित्ताने त्यांच्या संवेदनशील स्वभाव पुन्हा एकदा नव्याने अधोरेखित झाला आहे.