मी उपमुख्यमंत्री नाही, भूमिपुत्र म्हणून आलो;  एकनाथ शिंदे

सातारा: “मी उपमुख्यमंत्री म्हणून नाही, तर या मातीचा भूमिपुत्र म्हणून आलो आहे; जिथे कोणी जात नाही तिथे मी जातो,” असा ठाम आणि भावनिक संदेश उपमुख्यमंत्री Eknath Shinde यांनी सातारा जिल्ह्यातील अंगापूर पंचकोशीत आयोजित भव्य नागरी सत्कार सोहळ्यात दिला. छोट्या गावांपासून दुर्गम भागापर्यंत विकास पोहोचवण्याचा निर्धार त्यांनी यावेळी व्यक्त केला.

अंगापूर येथील प्राचीन हेमाडपंथी गणपती मंदिरात दर्शन घेतल्याने स्वतःला भाग्यवान समजत त्यांनी विघ्नहर्त्याच्या कृपेने अनेक संकटांवर मात करता आली, असे सांगितले. पालकमंत्री Shambhuraj Desai आणि शरद कणसे यांच्या आग्रहामुळे हा योग जुळून आल्याचे त्यांनी नमूद केले.

“मोठ्या शहरांकडे सर्वांचे लक्ष असते, मात्र छोट्या गावांकडे दुर्लक्ष होते. पण जिथे कोणी जात नाही, तिथे एकनाथ शिंदे जातो,” असे सांगत त्यांनी कोकणातील मंदिर लोकार्पणाचा उल्लेख करत ग्रामीण भागाशी असलेले आपले नाते अधोरेखित केले.मुख्यमंत्रीपदाच्या कार्यकाळात ५६७ निर्णय घेतल्याचे सांगत त्यांनी लाडकी बहीण योजना, शेतकरी सन्मान योजना आणि विद्यार्थ्यांसाठी राबवलेल्या उपक्रमांचा आढावा घेतला. “कोणीही सत्तेत आले तरी लाडकी बहीण योजना बंद होणार नाही,” असा ठाम विश्वास त्यांनी व्यक्त केला.

शेतकऱ्यांसाठी केंद्राच्या योजनेत राज्याने अतिरिक्त मदत देऊन लाभ दुप्पट केल्याचे त्यांनी सांगितले. नुकसानभरपाईच्या अटी सुलभ करणे, सिंचन प्रकल्पांना गती देणे आणि ग्रामीण विकासाचा वेग वाढवणे यावर सरकारचा भर असल्याचे त्यांनी स्पष्ट केले.साताऱ्याच्या मातीचे कौतुक करताना “ही माती अन्यायाविरुद्ध लढायला शिकवते,” असे ते म्हणाले. तसेच साताऱ्यातील युवक देशाच्या सीमेवर सेवा देत असल्याचा अभिमानही त्यांनी व्यक्त केला.

महायुती सरकारला मिळालेल्या जनसमर्थनाचा उल्लेख करत त्यांनी लोकसभा आणि विधानसभा निवडणुकांतील यशाबद्दल जनतेचे आभार मानले. “२३२ जागा देऊन जनतेने इतिहास घडवला,” असेही ते म्हणाले.तीर्थक्षेत्र विकासासाठी निधी वाढवून ५ कोटी रुपये करण्यात आल्याची माहिती देत त्यांनी वारकऱ्यांसाठी दिंडी अनुदान सुरू केल्याचे सांगितले. “या भागातील विकासकामांना निधी कमी पडू देऊ नका,” असे निर्देश त्यांनी पालकमंत्र्यांना दिले.

कोकण आणि पश्चिम महाराष्ट्र जोडणाऱ्या पायाभूत सुविधांचा विकास, स्थानिकांना रोजगार आणि स्थलांतर रोखण्याचे प्रयत्न सुरू असल्याचे त्यांनी नमूद केले.“आम्ही सोन्याचा चमचा घेऊन जन्माला आलो नाही; पण जनतेच्या आयुष्यात सोन्याचे दिवस आणण्यासाठी काम करत आहोत,” असे सांगत त्यांनी “माणसं कमावणं हेच खरे यश” हा संदेश दिला.या कार्यक्रमाला पालकमंत्री Shambhuraj Desai, शरद कणसे तसेच शिवसेनेचे स्थानिक पदाधिकारी व कार्यकर्ते मोठ्या संख्येने उपस्थित होते.