लक्ष्मीकांत बेर्डे यांनी मला फॉलो केल; अशोक सराफ यांचा खुलासा म्हणाले…

मुंबई: मराठी सिनेसृष्टीतील दिग्गज अभिनेते अशोक सराफ यांनी आपल्या अभिनयाच्या जोरावर अनेक दशकं प्रेक्षकांच्या मनावर अधिराज्य गाजवलं. विनोदी असो वा गंभीर भूमिका, त्यांनी प्रत्येक व्यक्तिरेखा आपल्या खास शैलीत जिवंत केली. त्यांच्या समकालीन आणि तितक्याच लोकप्रिय अभिनेत्यांपैकी एक म्हणजे लक्ष्मीकांत बेर्डे.

अलीकडेच दिलेल्या एका मुलाखतीत अशोक सराफ यांनी लक्ष्मीकांत बेर्डे यांच्याविषयी मनमोकळेपणाने भाष्य केले. ते म्हणाले, “लक्ष्या एक अत्यंत टॅलेंटेड आर्टिस्ट होता. कोणताही बॅकग्राऊंड नसताना त्याने आपल्या मेहनतीवर करिअर घडवलं. लहान-लहान भूमिका करत तो पुढे आला, हे त्याचं मोठं यश आहे.”

यावेळी सराफ यांनी एक महत्त्वाचा दावा करत म्हटलं की, “त्याने केलेले अनेक रोल पाहिले तर ते माझ्या शैलीला फॉलो केल्यासारखे वाटतात. अर्थात त्याची स्टाईल वेगळी होती, पण टायमिंग साधारण सारखंच होतं.” त्यांच्या या वक्तव्यामुळे पुन्हा एकदा दोघांच्या जोडीबद्दल चर्चा रंगली आहे.

लक्ष्मीकांत बेर्डे यांनी आपल्या कारकिर्दीत अनेक गाजलेल्या विनोदी भूमिका साकारल्या. मात्र एक होता विदूषक या चित्रपटातील त्यांच्या गंभीर भूमिकेनेही प्रेक्षकांची मनं जिंकली होती. तरीही सराफ यांच्या मते, “त्याने कॉमेडीच्या पलीकडे फारशी व्हरायटी केली नाही. तो कॉमेडीतच अधिक रमला.”

दोघांनी मिळून सुमारे ५० चित्रपटांत एकत्र काम केल्याचे सांगत सराफ म्हणाले की, “अनेक चित्रपटांत मी हिरो असायचो आणि तो भाऊ, ड्रायव्हर किंवा सहाय्यक भूमिकेत असायचा. आमच्या दोघांची वेगळी स्टोरी सिनेमात असायची. त्या काळात आम्ही प्रेक्षकांना थिएटरमध्ये खेचून आणलं.”

मराठी चित्रपटसृष्टीतील ही गाजलेली जोडी आजही चाहत्यांच्या स्मरणात आहे. लक्ष्मीकांत बेर्डे यांच्या अकाली निधनानंतरही त्यांच्या आणि अशोक सराफ यांच्या चित्रपटांचा प्रभाव आजही तितकाच कायम आहे.